Мартрал 3-нний Дагъусттаннал БакIчи Сергей Меликов хьунаавкьунни Аьрасатнал ФС-лул Федерациялул Советрал Председатель Валентина Матвиенкощал. Хьунабакьаврий ххал бигьлай бия республикалул социал-экономикалул лябуккулул масъалартту.
Валентина Матвиенкол тIимунийну, хъуннасса мюнпатшиву дусса дур Федерациялул Советрай регион ккаккан даврил, федерациялул субъектирдал кьинирдацIунсса махъ кьамул бувсса ХIукмулий хIисавравун ласайсса бур региондалул циняв мурадру, яла хIарачат бувайсса бур ми бартбигьин.
ФС-рал Спикернал бусаврийну, 2020 шиналсса давурттал хIасиллах бурувгун, Дагъусттаннайсса тагьар аьмну ларсун къаоьккисса дусса дур, амма уттигу ливчIун бур дузал къавхьусса масъалартту.
«Федерациялул Советрайсса Дагъусттаннал Кьинирдай тамансса масъаларттал хIакъираву цалийн бувкIунни», – кунни Сергей Меликовлул. Мунал бувсунни миннувух бушиву халкь щинал дузал баврил, ишла дайсса щин марцI дуккан даврил, токрал ва газрал щаллу баврил, ххуллурду бакьин баврил, кугьнасса къатрава халкь цIусса къатравун бизан баврил, социал объектру даврил масъалартту.
Республикалул каялувчинал пикрилий, Дарбант шагьру лябуккан баврил масъала хъанай бур региондалий туристшиврул кластерданул агьаммурну.
Дагъусттаннал БакIчинал барчаллагь кунни Федерациялул Советрал Председательнал хъиривчу Илияс Умахановлухь ва Федерациялул Советрал регламентрал ва парламентрал иширттал сакиншиндарал комитетрал член Сулайман Керимовлухь Федерациялул Советраву республикалул мурадру ккаккан баврихлу.
