[dropcap]М[/dropcap]арт зурул 9-нний ЧукIуннал шяраваллил арснан, шеърирдал луттирдал авторнан, зунтталчунан, Аьбдулкьадир НякIучиевлун 80 шин хьунни. Чув, ци давурттай зий ивкIхьурчагу, ванал архIал зузиминнал хIурмат хIалал буванну даву дурну дур цува зузисса кIанай, Поэзиялул театрдануву уттигу бусравну ур. Шеърирду чичаврил гьунар бусса Аьбдулкьадирдул шеърирду бувкссар «ЦIубарз» журналданийгу, «Илчилийгу», бувкссар авторсса кIива-шанма лугу. Аьбдулкьадирдул юбилей барча дуллай, чIа тIий буру ванан цIакьсса цIуллушиву, цIу-цIусса луттирду, тIайлабацIуртту.
Поэзиялул театрданувусса даврил уртакьтал
СахIибулхайр дусса, махъ-ихтилатран тIааьнсса, цIу буну янна лаххайсса, дакI-аьмал хъинсса, чумартсса буттауссу Аьбдулкьадир! Вил юбилей барча дуллай, нагу ларгсса шинал дунияллийн бувксса вил «Оьрмулул гьунарду» тIисса луттиран нава чивчусса хьхьичIмахъ кказитрайнгу лахъан буван ччай бура. Барча аврил калималущал барчаллагьрал махъру хIисаврайгу.
Ххуллухъин тIий бури
бюрувкъатIригу,
Ххуллурдал тий ва ший
хъюлчай пашмансса,
Лихъан ччай буривав,
мина кьариртун,
Мина кьариртная
эбратгу ларсун?..
Аьбдулкьадир НякIучиевлул дакIнивату къявхъ увкусса вай ххуттардиву аьлттан чIалай дур хIакьинусса Лакку билаятрал пашмансса сурат. ЧIявуми ванал шеърирдугу буттал улклуха, лявхъу кIанттухасса бур, «Хханххираву цIакьсса кюру» бувсса ЧукIуннал шяраваллихасса бур. Ччянива шагьрулийнай изарчагу, ванал иттала къадукьлай дур шяраваллил накьичру. ДакI тяхъа-шад дуллалисса, ххуймунил, хIикматмунил, магьирлугърал лишан дусса бур накьичру тIисса махъ. Тамаша бизансса зат бакъар буттал шяравалу чIувну ххирасса Аьбдулкьадирдунгу шяраваллил ххуйшиврия бусан, гьамин, ва махъ ишла буллай ушивугу. Шаэр цувагу мукIру хъанай ур: «Шеърирду цIа дансса буссар къачинна, гьарцаннуву ттула ссихI буссар чинна». Цала тIийкун, «чаннасса дакIнива дакIнийхтунусса назмурду экьинани дуллай» ур. Учайсса махъгу буниялттунгу ччавулий ва дакIнийхтуну тIий ур. Ванал сайки циняв назмурдаву Лаккуйсса ссав куннасса аьчухшиву дур. ЛичIинува аьчухсса бур ччаврихасса шеърирду. Цикссагу шаэртурал цимивагу мазрай цимилагу аьч дурсса ччаврил асардал чIарах вагу увккун акъар. Лявкъуну бур ччаврияту асар хьунну учинмур. Цаламур махъ:
Гъинттул хъуру ттихIайни,
Уккара къаврду бахIин,
Вил оьрчIи карщул зума,
Чув пар учайрив, лякъин!
Укун пасихIшиврул даражалийсса дур ванал дакIнивату нанисса назмурду. Лакку мукъул кьадру бусса АьбдулкьадирдучIа кьиматрай бур лакрал учаларттугу. Миннуву цал архIал аькьилшиву ва пасихIшиву цIакь хьуну дунутIий. Ца чIивисса ххутталгума аьщуйн щун бувну щаллу-ккурккисса кьиссардал ва романнал мяъна-мурад бусайнутIий.
На Аьбдулкьадир НякIучиевлун чIа тIий бура цIакьсса цIуллушиву, къалещаннав тIий бура ванал дакIниву буттал улклуя шеърирдал мазрай буслансса гъирарал ламагу, бюхъугу ва ххари улланнав тIий бура ванал тарбиялул гьану цIакьну бивзсса лайкьсса наслулулгу. ЛичIаннав ЧукIуннал шяраваллил накьичру дунияллийсса ца ххуйшивуну.
