Мартрал 19-нний кIицI лагай Моряк-подводникнал кьини. 1906-ку шинал, Аьрасатнал император Николай II хIукмулийн бувну, аьрали флотрал жамирдал классификациялувун щинал лултту дуккайсса лодкардугу ларсъссар. Мура шинал кIицI лаглан бивкIссар Моряк-подводникнал кьинигу. Гихуннай чIярусса шиннардийсса хъамаритала хьунгу дурну, 1996-ку шиная шиннай му Кьини цIунилгу кIицI лаглан бивкIссар.
Дагъусттанлувтураву цалчинсса Совет Союзрал Виричу, подводник МахIаммад ХIажиевлул даву гихуннай дачин дурну, захIматсса, мунищала архIал бусравсса подводникнал пиша язи бувгьуну бур лакрал цикссагу жагьилтурал. ЧIявур му кьянкьаминнал пиша язи бувгьуми КIундиннал шяравугу, кIицI дуванна анжагъ цаппараннал цIарду: цалчинмур ранграл капитан, ляличIиссара нигьачIиндарал подразделениялул ветеран Кьурбанов Геннадий Шихаьлил арс, мичмантътал – МухIабуттаев МухIабутта Гарайханнул арс, Маммаев Руслан АхIмадлул арс.
Вай вирттаврал цIардалу му пиша язи бувгьусса лакрал цинявппагу къучагътал барча буллай, чIа тIий буру аьрщарай ва щинаву дуллалисса гьарцагу давриву тIайлабацIу, цIакьсса цIуллушиву, някIсса ссавнил лувсса паракьатсса оьрму ва къуллугъ.
