46 азарунния ливчусса оьрчIру

Ттигъанну Республикалул Перинатал центрданий хьунни перинатал диагностикалийн багьайсса семинар-совещание. Ми­кку бусаврийн бувну, 2020 шинал Дагъусттаннай бувну бур 46 азарунния ливчусса оьрчIру. Вилттили оьрчIру литIаву тIурча, ларгсса шинал хьуну дусса дур тарихраву яла чансса.

КIицI лавгунни мукунсса кка­ккияртту хьун дан бювхъушиву лякьлувусса оьрчIал цIуцIавуртту ялун личин даврил кьяйдарду хьхьичIуннай шаврийн бувну.
«ЧIярусса шиннардил дянив цIуну бувсса оьрчIру литIлай бия хъунмурчIин лякьлуварасса азарду сававну. Ми азарду ччяни ялун личин дан бюхъаврийну чан хьу­ссар цIуну бувсса оьрчIру литIаву.
ХIакьину Республикалул Минздраврал хIасул дурну дур лякьлувусса оьрчIал азарду ччясса мутталий ялун личин дуллансса шартIру. Бивхьуну буссар ттизаманнул УЗИ-аппаратру, лабораториялул анализаторду ва реактиврду.

Багьлай бур так Аьрасатнал ва Дагъусттаннал Минздраврал ккаккан дурсса норматив актру би­ттур дуллан ва лякьлуву оьрчI бу­сса хъаннин дагьайсса диагностика дузал дуллан. Мунийну жущавагу, жула пациенткахъащагу ттизаманнул чараннай цIуллусса оьрчIру дунияллийн буккан бан бюхъаншиврул»,– увкунни Да­гъусттаннал цIуллу-сагъшиву дуруччаврил министрнал хъиривчу Раиса Шахсиновал.

Семинарданий ккаккан бувну бия лякьлувусса оьрчIал азарду ччясса мутталий ялун личин даву хьхьарасса кIанттурду. Ххалбигьавурттайн бувну, хIукму бунни районнал ва шагьрурдал азарханардал хъуними хIакинтурая ва акушер-гинекологтурая гьарца зуруй тIалав дуллан лякьлувусса оьрчIал диагностика даврил ялувсса отчетру. КIицI лавгунни ва суал республикалул Минздраврал каялувчитурал къулагъасралу бушиву.

«2020 шинал республикалул роддомирттай бувну бур 46 азарунния ливчусса сагъсса оьрчIру. Миннава 839 оьрчI – лякьлувара азар дусса, вайннавагу 276 оьрчI – захIматсса цIуцIаву дусса. ХхюцIаллий цая оьрчIай цIуцIаву лякьлувура ялун личин дан къабювхъуну, миннал нитти-буттан оьрчIал цIуцIаврия кIул хьуну бур оьрчI дунияллийн бувккун махъ.
2020 шинал ва аьдад яларай дагьунни 2019 шинах бурувгун 27 процентрал. Амма Аьрасатнал ккаккиярттах бурувгун, ва ­аьдад лахъсса дур ца ва дачIиннул», – бувсунни ДР-лул Минздраврал хъунмур акушер-гинеколог Джамина Гебековал.

Лякьлувусса оьрчIан 12 нюжмар шайхту, цила чIумал бишин аьркинссар ттизаманнул УЗИ аппарат, цIуцIаву ялун личирча анаварну перинатальный консилиумрайн тIайла буккан. НигьачIавривусса хъами цила чIумал тIайла буккан Республикалул Перинатал центрданул Медико-генетический центрданийн, консультациягу дурну, хъирив лаяншиврул.