Мартрал 24-нний, ца Дагъусттаннай акъа, мунил кьатIувгу лап ххуйну кIулсса, республикалул архитектортуралул магьирлугъраву хъунмасса бутIа бивхьусса, архитектортурал ккураннаву бусравсса ва сийлийсса пишакар, ГьунчIукьатIрал шяраватусса Жаруллагьлул арс Керимов КьурбанмахIаммад Керимовлул кIицI ларгунни оьрмулул 70 шин.

Миннува 45 шин хьуну дур ванал архитектуралул ва градостроительствалул аралуву зий. Чан­сса дакъар жула хъуншагьрулул кучардай ванал проектирдайну дурсса къатри.
ЗахIматрал ххуллул дайдихьу ватандалий, Дагъусттаннай, хьунугу, оьрмулул ххуллул дайдихьурив ванал хьуну дур архсса УзбакIнаву. Увну ур ва 1951 шинал, нину-ппу жагьилний яхъанай бивкIсса Каган шагьрулий. Гъумучиял школагу арцул медальданий къуртал бувну, дуклан увххун ур Москавуллал архитектуралул институтравун. Дуккавугу къуртал дурну, МахIачкъалалив зана хьувкун, ххуйсса кIулшивурттащалсса жагьилсса пишакар кьамул увну ур «Даггражданпроект» институтравун. Гикку укунасса архитекторну зий айивхьуну, цаппара хIаллава ивтун ур группалул каялувчину. Цалнияр цал пишалул усттаршивугу магьир хъанай, ванайн оьвтIун бивкIун бур хъуни-хъунисса проектирдаву хIала-гьуртту хъанан.

Заманалуха ва чIумуха лав­хьхьусса идарарттал проектир­­даха зий ивкIнугу, Кьурбан­махIаммадлун хъунмасса гъира бикIайсса бивкIун бур жула бу­ттал буттахъал цIувцIучарил къатри даврил усттаршиврухгу. Га цала гъирагу ванал ишла бувну бур, аспирантуралувун увххун, «Архитектурно-композиционные закономерности формирования поселений в горном ландшафте» тIисса диссертация чичайни. Элмийсса даву дурурччуну махъ КьурбанмахIаммад зун ивкIун ур СССР-данул Элмулул академиялул Дагъусттаннайсса филиалданий ва Политехрал институтраву.
1995-2000 шиннардий Кьур­банмахIаммад увчIуну ивкI­ссар Аьрасатнал Архитектортурал союзрал Дагъусттаннайсса правлениялул хъунаманугу. Микку зузиссаксса хIаллайгу ванал чIярусса ххуй-ххуйсса давуртту бартдиргьуссар. КьурбанмахIаммадлул канила дуркссар Дагъусттаннал тарихрал ххуттайн ласунсса: личIи-личIисса иширттацIун дархIуну дурсса проектругу. КIицI лаганну Гимриллал шяраву бувсса имам Гъази-МухIаммадлул къала, Ру­гъужиял шяравусса мемориалданул мизит, Къара-Къуйсулийхсса ЯтIул ламучIасса Аьндалаллал къала ва м.ц.
Ванал проектрайну був­ссар Дагъусттаннал миллатирттал цачIундур кьюкьрал Надир-шагьнал аьраллу ххит буккан бувсса тарихран хасъсса, Ссугъращиял шяраваллил чIаравсса, «Ватан» тIисса аьнтIикIасса мемориалгу. Ва проект цурдагу лайкь хьуссар «Аьдатру ва новаторство» тIисса Аьрасатнал конкурсрал Цалчинмур даражалул дипломран.

Уттизаманнул архитектуралул цIушиннардугу ишла дурсса ванал проектирдайну був­сса идарарттавух кIицI банну Каспийскаллал хьхьирицIухсса паркравусса «Русгидролул» идарагу. КьурбанмахIаммадлул проектирдайну Хъун дяъвилул гьурттучитуран хасну дурсса мемориаллу дуссар дирхьуну ванал буттал шяраву ГьунчIукьатIув ва чIаххуврайсса КIямашавгу.
Утти республикалул каялувчитурал хIукму бувну буссар МахIачкъалалив Тарки-Тау зунттуй «КIяла кьурукьирттан» хасну дишинсса монументрал проектгу ванайн тапшур дан.
Аьрасатнал ва Дагъусттаннал архитектуралул аралуву бивхьусса захIматрахлу КьурбанмахIаммад Керимов лайкь хьуссар «ДР-лул магьирлугърал деятельнал» цIанин ва ванан дуллуссар ДР-лул ПаччахIлугърал премия.

КьурбанмахIаммад, гьунар лавайсса пишакар акъа­сса, ур ххаллилсса кулпатрал заллугу. Ванал цала кулпат Ханичащал, хъунигу бувну, оьрмулул ххуллурдайн бивчуну бур ца арс ва кIива душ. ЦIана пенсиялийнгу бувккун, оьрчIая бивзсса наслулух аякьалий бунугу, Ханичагу чIярусса шиннардий зий бивкIссар МахIачкъалаллал поликлиникарттай хIакин-терапевтну. Ва Вилттащиял шяраватусса, чIявучин кIулсса Аьзиевхъал тухумрая­сса бур.
Хъуннасса юбилейгу барча дуллай, чIа тIий буру Кьур­банмахIаммадлун цIуллу­шиву ва гихунмайсса захIматрал ххуллийгу так тIайлабацIуртту!