АьФ-лул ФС-лул Федерациялул Советраву Дагъусттан Республикалул Кьинирдай гьуртту хьун
Мос­кавлив бувкIунни республикалул каялувчи Сергей Меликов бакIчисса Дагъусттаннал делегация

Сергей Меликов гьурттусса цалчинсса давуну хьунни Федерациялул Советрал Федератив дузалшиндарал, региондалул политикалул, кIанттул цилакаялувшиврул ва Ухссавнил иширттал комитетрал гьарта­сса батIаву.
Муний ххал бигьлай бия республикалул социал-эконо­микалул лябуккулул цаппара захIматсса масъалартту. БатIаву хьунни Федерациялул Советрал Председательнал цалчинма хъиривчу Илияс Умахановлул ва Федерациялул Советрал федератив дузалшиндарал, регионнал политикалул, кIанттул цилакаялувшиврул ва Ухссавнил иширттал комитетрал председательнал 1-ма хъиривчу Андрей Шевченкол каялувшиврий.
БатIаврий махъ лахълай, Сергей Меликовлул бувсунни республикалул каялувчинал сипта хьушиву Федерациялул Советрай дуван Дагъусттан Республикалул Кьинирду – Да­гъусттаннан хъуннасса агьамшиву дусса захIматсса масъалартту гьаз баншиврул. Ми масъалартту дузал баврийну тамансса лябукку хьун най бунутIий региондалул социал-экономикалул иширттаву.
Андрей Шевченкол бувсунни Дагъусттаннал вакилтурая бавну ччай бушиву дузал буван захIмат хъанахъисса масъалартту чулийн буккан баврил ххуллурдал хIакъираву.
Мукунсса масъаларттуну хъанай бур: МахIачкъалалив коллектор баву. Комитетрал батIаврий ихтилат хьунни му коллектор бакIуйн буккан баврия ва КОР-данул щин чапал хъанай душиврия.
МахIачкъала ва Каспийск шагьрурдай къатри дуллалаву национал проектирдайн чул бивщуну, шагьрурдал диц-куц ххуй-хъин хьуншиврул.
ЛахIунттив дуцлацисса кIан­ттурдава халкь бизан баврил масъала, аьрщив сукку шаврил масъала.
2021-2025 шиннардий Дарбант шагьрулул лябуккулун­сса давурттал хIакъиравусса ма­съала.
Ми масъаларттал хIакъираву ихтилатру бунни профилсса министерстварттал ва идарарттал каялувчитурал.
БатIаврий ихтилатру бунни Москавлия бувкIсса цаймигу къуллугъчитурал.
Сергей Меликовлул барчаллагь кунни властьрал федерал ор­ганнал вакилтурахь республикалун кумаг буллалаврихлу, мунал умуд бивхьунни ттинияр тихунмайгу хIала-гьрттуну зунтIишиврий: «Жу хIакьину гьаз буллай буру анаварну дузал буван аьркинсса масъалртту», – увкунни республикалул каялувчинал.