Щаллагу дунияллийх Дагъусттаннал цIа дуккан дурсса «Лезгинка» ансамбльданунсса Къатта буллай байбивхьунни ва шинал. Къатта буллалиссар МахIачкъалалив, «Лазурный берег» райондалул аьрщарай, «Культурная среда» тIисса федерал проектрал ва «Культура» нацпроектрал лагрулий.
КъавтIаврил ансамбль сакин бувну бур 1958 шинал, муния шинмай коллективрал къабивкIссар цинма хасъсса къатта.
ХIакьинусса кьини ансамбльдануву ур 90 инсан. Ми бакъасса, «Лезгинкалул» школа-студиялийн занайгу 150 оьрчI ур. Ансамбльданул вирдакIмур коллективгу, хъирив нанисса никирал чIава къавтIалтгу бур къумасса къатраву. ЦIанихсса коллективрал ларсъсса чIяру наградартту, ккаккиялун дишинсса, музей бувансса кIану бакъа, складраву дирхьуну дур. Мукунна къумасса къатраву ядуллай бур 800-ннийн дирсса костюмру, багьлул ххирасса янна-ус.
Аьрасатнал Президент Владимир Путиннул «Лезгинка» ансамбльданунсса Къатта баврил хIакъиравусса хIукму кьамул баврия ххарину бур коллектив ва ванил каялувчи Жамбулат МахIаммадов.
ЦIуну буллалимур Къатлуву бикIантIиссар ансамбльданул агьаммур коллективрал репетицияртту дуллансса кIива хъунмасса зал ва чIава къавтIалтрансса кIива зал. Мукунма бикIантIиссар трюкачтурансса, музейрансса, фонотекалунсса ва чIявусса цаймигу къатри.
Жамбулат МахIаммадов барчаллагьрай ур Аьрасатнал ва Дагъусттаннал культуралул министерстварттайнгу, ва комплекс бавриву буллалисса кумаграхлу.
Бадрижамал Аьлиева
