Дагъусттаннал БакIчинал буржру чIумуйну бартбигьлагьисса Сергей Меликов ивунни Казбеков райондалийсса, тIабиаьтрал гьайкалданун ккаллисса «Алмакский каньондалийн».
Тикку ванан ккаккан дунни туристътал кIункIу буваншиврул дуллалисса давуртту, бувсунни, 100 кIану бусса, агьали хъин хъанансса ва бигьалагансса къулайсса шартIру дусса комплекс буллалисса проектрая. Дарувсса щин ва цаймигу тIабиаьтрал мюнпатрансса ресурсру дусса паркраву цIанакул хъун бакъасса эко-домик бур, минахуртал дакI дарцIуну бур, паркраву ххуйсса къатри буварча, туристътал ила бичиншиврий.
Меликовлул ххал дунни бюрунттал фермагу. 1974 шинал тикку ттангъриду бюрунттал заповедник бувну бур, цIанакул 1400 бюрни бур. Республикалул хъунама тиккува чай бурттий лагма увккунни «Алмакрал» майдандалийх, маслихIат бунни дучрайсса маршрутгу дуван. «Дучрайсса маршрутрал турисътал кIункIу бувантIиссар райондалийн, кIанттул агьалинал оьрмурду хьхьичIунмай хъанахъиссар туризм гьаз дуллалисса давурттайну, ххуллурду бакьин бувну, ттукIралсса, щиналсса бувну, ххуйсса инфраструктура дузал дувайхту»,- увкунни ванал.
Тиккура дунни туризм гьаз дуваврил масъалартту ххал бигьлагьисса совещаниягу.
Сергей Меликовлул дакIнийн бувтунни 2025 шиналнин Дагъусттаннал оьрму хьхьичIунмай хъит учин бувансса «Концепция развития» дуван тапшур бувну бушиву, му Концепциялул ца гьанумур къяртта туризм хьун аьркиншиву.
Республикалий туризм гьаз дуваву мурадрай цуку-цукунсса давуртту най дуссарив бувсунни туризмалул министр Расул Ибрагьимовлул. Ванал бувсунни хIакьинусса кьини республикалий бушиву 51 турист база, 23 санаторий, курортру, 230 гостиница ва 54 хъамал кьамул бувай къатта. Гьаз бунни туризмалуха зунсса хасъсса кIулшивуртту дусса минахуртал чанну бушиврул, ми хIадур буван багьлай бушиврул масъала.
Сергей Меликовлул кIицI лавгунни гьарцагу райондалун цинна хасъсса ляличIишиву душиву, цавай районнай хIикматсса тIабиаьт душиву, тайми районнай экстремал журалул спортрансса шартIру душиву, цуми районнай цумур журалул давуртту дуван багьлай бурив хIисавравун лавсун, сантирай ва лябукку буну туризм гьаз дуван аьркиншиву.
