Утти жува аьдат хьунуккару ва ларгсса дачIи шинал мутталий щалва билаятрал циняв цIусса хаварду, интернетравух бикIу, телевизорданувух бикIу, коронавирусрацIун дархIусса тагьардания байбихьлахьаврийн. Аьдат къавхьунугу цибанну, хIакинтурал буллалисса маслихIатирттах вичIи диширча бакъа, жущава цIана бан шайсса цамур бакъахьувкун. Ва нюжмардий «Дагъусттан» РИА-лул корреспондентнащал хьусса ихтилатраву Дагъусттаннал паччахIлугърал медициналул университетрал ректор Сулайман Маммаев буслай ур му азарданул инсаннал цIуллу-сагъшиврун биян буллалисса заралдания ва муниясса нигьачIаврия.

---

– Сулайман Нураттинович, буси инсаннал иммунитетрая ва коронавирус щаврия жулла цIуллу-сагъшиврун цуксса нигьачIаву ду­ссарив.

– Инсаннал иммунитетрал система цанницIун ца бавзу­сса цимивагу бутIуя сакин хьу­сса затри. Масалдаран, клеткалул иммунитет сакин хьуну ду­ссар личIи-личIисса функциярду щаллу буллалисса клеткардая. Гуморальный иммунитет тIурча, сакин хьуну дуссар антителардая ва миннул бакIщаращун ккаллисса В — лимфоцитардая. Ва зат кIулну бикIан аьркинссар, цанчирча, дарурттал асар биян байнутIий иммунитетрал ми журардайн личIи-личIину.

Ттинин дурсса хъиривлаявур­ттал чIалачIи бувну бур ковидрал къашавай бивкIсса чIявуминнал оьттуву хасъсса, ганиннин итталун къадагьлай диркIсса антителарду ляхълай душиву. Ми ля­къайсса дур симптомругу дакъанура му азар лархъсса инсантурал оьттувугу.

Мунияту, ковидрал къашавай ивкIсса инсаннал оьттуву агарда ми антителарду къалякъирча, мунил тас­ттикь къабуллалиссар га инсаннал цIуллу-сагъшиву мюхчанну дакъашиву. Вирусрая ххассал ансса иммунитет ганал чурххаву хIасул къархьуну къаличIайссар ва захIматну къашавай хьун бюхъавриягу уруччайссар.

Мува иш бикIайссар вирусрал гайми азарду дунийгу. Вирусрал къашавай ивкIсса инсаннал чурххаву га азарданул бияла хьхьара хьуншиврул чIун аьркинссар.

– Бюхъайссарив цал къашавай ивкIсса инсан ялагу коронавирусрал къашавай хьун?

– Аьлимтураща хIакьинусса кьинигу бюхълай бакъар му суалданухьхьун балжийсса жаваб дулун. Къашавай хьун бюхъай­ссар, тIий бур ми, мугу так-макну. Цанчирча ва дур ттигу мяълумну ххал дигьин дурасса, хъирив къалавсса азар.

Щалла дунияллийх аваза бувтсса ковид ялун лирчуну хьуну бур бувагу арулва барз. Аьлим­турал бувар ттигу тас­ттикь буван жува му азардания иммунитетрал хха­ссал бан бюхъай­ссар тIисса затгу. Амма дур­сса хъиривлаявурттайн бувну, чIалай бур цIусса вирус SARS тIисса вирусрачIан (атипичная пневмония) ва MERS тIисса вирусрачIан гъансса , миннул куннасса симптомру дусса азар душиву.

2002-2003-ку шиннардий SARS вирус лархъун диркIсса къашайшалтрал оьттуву антителарду яхьуну дур кIира шин ва ххишалагусса мутталий. MERS вирус щумур къашайшалтрал оьттуву тIурча, антителарду 5-6 шинай яхьуну дур.

Мунияту, цал ттигу тикрал бан, лахъисса чIумуй яшайсса иммунитет лярхъуссар учин ттигу ччяссар. Аммаки, ва кутIасса манзилданул дянив дурсса хъиривлаявурттайн бувну, кIул бувну бур циняв къашайшалтрава­сса 10 процент халкьуннал иммунитет шанма зурувату хьхьара хьуну душиву.

Ковидрал къашавай ивкIсса инсаннал оьттуву антителарду яшайсса дусса дур сайки ххюва зуруйсса. Укунсса мисал бувцуну бур Нью-Йоркуллал медициналул центрданий зузисса аьлим­турал. Ва хъиривлаявриву гьуртту хьуну ур коронавирусрал къашавай ивкIсса 30 азара инсан. Аьлим­турал дурсса хъиривлаявурттайн бувну, антителардал инсан мурахас айсса ур кIилчингу азар лахъаврия, ва, лахъарчагума, му азар бигьану духIан шайсса дур.

Миннал бусаврийну, ковидрал къашавай бивкIсса 15-20% халкьуннал оьтту­ву антителарду къаляркъуну дур цаппара зурдардива.
Утти къулагъас данну Лондоннал Имперский колледжрал аьлимтурал хъиривлаявурттах. Миннал тIимунийн бувну, къашавай бивкIминнал оьттуву антителарду къалякъайсса дур азар яла ларгун хъунма хIал къалавгун бунагу. Хаснура ччяни ми дакъа шайсса дур симптомру ялун къалирчуну къашавай бивкIминнал оьттува.

Миннала хъиривлаявурттайн бувну, антителарду бат шайсса дур ччя­сса чIумул мутталий 75 шин ххишалагу хьусса къашайшалтрал чурххавагу.
ХIасил, чIявуми хIакинтурал бусаврийн бувну, кIилчин ковидрал азар лархъсса ишру къамуксса чIявусса бусса бур.

– Ковидрал мутациярдаягу бувсун ччива жула буккултрахь.

– Гьарцагу вирусрал дуссар цилла кьяйдалийсса низам. Щалла дунияллийн аваза бувтсса SARS-CoV-2 сакин хьуну дусса дур саргъунну бивхьусса 30 азарваксса молекулалия. Утти аьлимтал нигьачIий бур, му саргъун­сса низам зия дансса цамур жура мунивух хIала къабухханхьуви тIий. Хъуннасса нигьачIаву дуссар, му вирус ваниярдагу лап оьдиркIун, агьали азурда буллан бикIайхха тIиссагу. ЦIана вирусрал 22 штамм ххал бигьлай ялув бавцIуну бусса бур.
Амма къаххуйсса тагьар цIана дур вирусрал цIусса штамм лявкъусса Европанал 12 паччахIлугърай. Аьрасатнаву тIурча, ттигу бувар ми ялун личин.

– Вил пикрилий, ва тагьарданува жува ахиргу та букканавав? Вакцинарив жува ххассал бан­сса дарув-дарман?

– Цуксса ччяни му вакцина буллай жува сукку хьурив, муксса ччяни хIасул хьунтIиссар жулла обществалувугу коллективсса иммунитет. ХIакьину чIярусса компанияртту зий дур вакцина итабакьавриха. Миннул ялув­сса хъиривлаявурттал принципругу личIи-личIисса дур.

Циняв вакцинардал сияхIрал бакIрайгу бур цалсса жулва билаятрай итабавкьусса «Спутник V» тIимур, цуппагу яла нигьачIаву дусса агьалинан цIана буллалисса. Мукунна хъиривлаявуртту най дур «Вектор» тIисса ПаччахIлугърал элмийсса вирусологиялул ва биотехнологиялул центрданий итабакьинтIисса «ЭпиВакКорона» вакциналул хIакъиравугу. Ххуйсса перспектива дусса дур М.Чумаковлул цIанийсса Хъиривлаявурттал ва даруртту итабакьлакьисса элмийсса центрданий ххал бигьлагьисса вакциналулгу.

Аьмну вакцинациялия гъалгъа тIурча, цумур-цагу вакцина бувну ттуршийла хъинссар цурда азарнияр ва муния жулла цIуллу-сагъшиврун биянтIисса заралнияр. Вакциналиясса заралнияргу, кIилий-шамлий ковидраясса зарал бусса бур жунма нигьачIисса.

Шиккува кIицI бан, американал пишакартурал дурсса хъиривлаявурттайн бувну, укунна­сса гриппрал прививка дурсса инсантуралгума ковидрал азар бигьану лахъайсса дусса дур. Мунияту чил хIукуматирттайсса хIакинталгу маслихIат буллай бур гриппрал прививкарду дан агьалинал 70 %. Аьрасатнал хIакинталгу мунилва ялун ва ишираву маслихIат буллай бур жула агьалинахь пневмококк­рал инфекция ппив хьун къаританшиврул прививкарду дан.

Ва гъинттул августрай италиянал хIакинтурал дурсса хъиривлаявурттайн бувну, азар ппив хьуннин, ссуттилва грипп­рал ва пневмококкрал вакцина бувну бивкIсса бугьарасса къашайшалт, авара къавхьуну, ччяни хъин шайсса бивкIун бур.

Пандемиялул къабигьа­сса суаллу бивхьунни щалагу инсаниятрал, билаятирттал ва щаллагу медициналул хьхьичI. ЧIун наниссаксса, ми мурадру бартбигьлай, гьантлия гьантлийн ххувшавричIансса шаттирдугу сивсуну ласлай най буру жува. Жулва хъунмур мураднугу хьун аьркинссар – азар дух даншиврул жухьва буллалисса маслихIатругу лалавсун, дан багьлай бухьурча, вакцинациягу дурну, маскардугу лахлай, чIявусса халкьру бусса кIанттурдайх къазанай, низамрай зана-кьала хъанахъаву.

ХIадур бувссар
Залму АьбдурахIмановал