Лакрал театр тIитIлай бур 85-чинсса сезон

Коронавирусрал пандемиялуцIун бавхIусса ссуссукьушиннардал чаранная мукьах республикалул театрду байбивхьунни ахиргу тамашачитурал хьхьичIун буклай. Оьруснал театрданул хIадур дурну дия коронавирусрал цIуцIаврищал талай бивкIсса хIакинтурахь барчаллагь тIутIисса концерт.
Жунма кIулсса куццуй, магьирлугърал идарартту онлайн-кьаралданий зий байбивхьуссар апрель зуруй. Ва чIумул мутталий дагъусттаннал театрдал онлайн-кьаралданий дурунни 300 мероприятие: ккаккан бунни спектакллу, творчествалул ва музыкалул мажлисру, мастер-классру, акцияртту ва флешмобру.
Лакрал театрданул Ютуб каналданий уттинин цачIун бавтIунни ряхазарунниха ливчусса тамашачитал.


Амма театр – му дур оь щурущисса гьутру-ттиликI, гьавас лекъащаншиврул тамашачитурал асарду аьркинсса.
Культуралул министерствалий кIицI лавгунни, театрду хIалли-хIаллих тамашачитурал хьхьичIун буклан тIий бухьурчагу, идарарттаву дикIан тIий душиву кьянкьасса ссуссукьушиннарду. Аьрасатнал Федерациялул Культуралул министерствалул амрулийн бувну «О мерах, направленных на недопущение распространения новой коронавирусной инфекции (COVID-19) при осуществлении деятельности подведомственными Министерства культуры РФ организациями»: заллавун итабакьлан бучIи буллай бур 25 процент тамашачитурал; идарар­ттай цIакь дуллан кка­ккан бувну бур эпидемиялийн къарши­сса давуртту; тамашачитал къаитабакьлан маскарду дакъа; ххал дуллан залданувун бухлахиминнал температура.

Лакрал театрданул артис­тал пандемиялия мукьах цалчин тамашачитурал хьхьичIун буккан тIий бур декабрь зурул 4-нний. Ва кьини театрданул тIитIлай дур 85-мур театрал сезон, У. Шекспирдул пьесалия­сса «Тарс мютIи баву» («Укрощение строптивой») спектакльданул премьера ккаккан баврийну. Лакку мазрайн бувцуну бур Сулайман Мусаевлул.

Режиссер-постановщик В. Тхапсаевлул цIанийсса Ухссавнил АьсатIиннал паччахIлугърал академический театрданул хъунама режиссер, Ухссавнил АьсатIиннал лайкь хьусса артист Гиви Валиев. Художник-постановщик Лариса Валиева.

Роллу дугьлай бур Да­гъус­ттаннал тамашачитуран ххира хьусса артистал Аслан Ма­хIаммадов, Шамсуттин Къапланов, Зинаида Чавтараева ва цаймигу.
Спектакль бихьлахьиссар кIива мазрай – лакку мазрай ва оьрус мазрай.
Премьера хьунтIий бур декабрь зурул 4-нний 18.30 ссятраву.

Декабрь зуруй ккаккан бан тIий бур шинал лажиндарай ккаккан бан багьлай бивкIсса мукьва премьера ялагу. Ми бур: сербнал драматург М. Митровичлул пьесалиясса «Хьхьудяризалсса хъямалашин» (режи­ссер М. Сурхатилов); аьсатIиннал драматург Г. Хугаевлул пьесалиясса «Хъунавшавуй, чуннайра?» (режиссер А. МахIаммадов); В. Массал, А. Червинскийл, Ф. Эрмлердул чивчусса пьесалиясса «ЧIаку гьанттайнсса» («Званый ужин» режиссер М. Сурхатилов). Театр зий бур тамашачитуран лап ххира хьусса Г. Гагиевлул пьесалиясса «Москавлиясса гьалмагъай» спектакль цIубуккан бавриха.

ХIадур хъанай бур Дагъус­ттаннал халкьуннал шаэр Салимат Кьурбанова дунияллийн бувккун 100 шин там шаврил юбилей кIицI дан.
Яргсса ва авадансса бикIан­тIий бур аьдатравун багьсса ЦIушинал мажлис.

ЦIусса шин театрдануву дайдишин тIий дур Театрданул 85 шинал юбилейран хас дурсса фестивальдания, цувгу тIитIинтIиссар Гьарун Саэ­довлул «Къалайчитал» спектакльданийну. Фестивальданул лагрулий тамашачитуран ккаккантIиссар лакрал драматургтурал пьесардаясса спектакллу: «Хан-Муртазааьли» (ЦI. Камалов»), «Оьтту ва макь» (С. Кьасумов), «Гъумучиял ПатIимат ва Бархъаллал Маллай» (С. Кьасумов), «Ккурккуллал Щаза» (Х. Халилов, Г. Султанова), «Гъази-Гъумучиял серенада» (К. Мазаев, «Камаллул Башир» ( М. Абасилов).