Вай гьантрай МахIачкъалалив хьунни ДТП-рттаву оьрмурдацIа хьуми дакIнийн бичайсса кьинилуцIун дархIусса мероприятие. Шикку гьуртту хьунни Дагъусттаннал жагьилтурал иширттал министр Камил Сяидов, Дагъусттаннал ГИБДД-лул управлениялул хъунама, полициялул подполковник Александр Шалагин.
Мероприятие тIитIлай, Камил Сяидовлул кIицI лавгунни цала министерствалул хьхьичI ххуттайн лавсъсса масъаларттавасса ца ххуллурдай аварияртту чан дансса чаран лякъавугу бушиву. Хъирив ихтилат бунни Александр Шалагиннул.
– Гьай-гьай, ттун хъинну ччива ххуллурдай цуяца инсаннан апатI къавхьуну, цаягу инсан оьрмулуцIа къавхьуну, амма цифрарду ццах бутансса бур. Дунияллий гьарица 12 минутрал дянив ивкIлай ур аьрххи- ххуллийн увксса ца инсан. ЧIявусса апатIру хъанай бур жулла республикалул ххуллурдайгу. Ва тагьар къулай даву мурадрай зий бур, ГИБДД бакъассагу, республикалул цаймигу ведомствартту. На миннайнгу барчаллагьрай ура, – увкунни ванал.
Хъирив, ДТП-рттаву оьрмурдацIа хьусса оьрчIая бусласисса листовкарттугу канил дургьуну, мюрщи инспектортал бия бахьттагьалт лахъайсса ххуллий машинартту бацIан буллай.
2020-ку шинал ДТП- рттаву оьрмулуцIа хьуну ур 1246 дагъусттанчу, миннавух ур оьрмулул 16 шинавун ияннинсса 15 оьрчI.
Мероприятиялий гьуртту хъанахъиминнал ливтIуминнал аьпалун баян бунни минутрайсса пахъ багьаву ва итабавкьунни гьаваллавун шарду. Ахирданий щупиртурайх ва бахьттагьалтрайх дарчIунни чани лахълахъисса затру, мукунна цала-цала мазурдийсса памяткардащалсса ххуйсса кьанкьру.
ДакIнийн бутан, ДТП-рттаву ливтIуминнал аьпалул кьини щаллагу дунияллий кIицI дуллан бивкIссар ООН- далул Генеральный Ассамблеялул хIукмулийну 2005- ку шиная шихуннай, ноябрь зурул шамилчинмур алхIаткьини.
