Вай гьантрай Москавлив зий дайдирхьунни «Женщина-лидер» тIисса цIанилусса цIусса кIулшивурттал программалул кIилчинсса модуль.
Программа щаллу дуллалиссар АьФ-лул Федерал МажлисрацIунсса Хъаннил евразий форумрал Советрал чIарав бацIаврийну. Ва даврил сиптачитурал мурадрунугу бур уттизаманнул социал масъалартту щаллу бавривух шайссаксса чIявусса хъами хIала баву, хьхьичIунсса хъаннил цIусса сообществарду хIасул даву ва думи хьхьичIуннай нани даву.
Федерациялул советрал Председатель, «Лидеры России» конкурсрал сиптачитуравасса ца, Валентина Матвиенкол бусаврийну, программалух цалчин вичIи дирхьуминнавух бур 140 хъамитайпа – Хъаннил евразий форумрал советрал проектирдал гьурттучитал, «Лидеры России» тIисса управлентурал конкурсрал финалистътал ва миннуй ххув хьуми.
«Женщина-лидер» программа сакин хьуну дур мукьра модульдания: миннува шанна – онлайн-режимрайсса, ца – очнайну декабрьданий хьунтIисса, агарда цIанасса захIматсса санитар-эпидемиологиялул тагьар дахкъачирча. Цалчинмур модульданул вебинарду хьуну махъ проектравух гьуртту хъанахъисса хъами бавчIунни ца-ца командалуву 3-5 инсан усса 25 командалийх.
Вания тийнмай ми, программа щаллу хъанахъисса кIива зурул дянив, зунтIиссар цалла соцпроектру щаллу давриха. Миннан лахьхьин буллантIиссар цавурасса лидернал лишанну цукун ишла дуллантIиссарив, паччахIлугърал структурардащал цукун зунтIиссарив.
Бадрижамал Аьлиева
