Вара кьини Трутнев ивуна «Уйташ» тIисса инвестициярттал площадкалийн. Тикку Москавлиятусса хъун хъамаличунахьгу, республикалул хъуниминнахьгу экономикалул министр ХIажи Султановлул балжийну бувсуна бартдигьлагьисса инвестпроектирттая. Бувсуна аьмну 5 инвестпроект бартдигьлай бушиву, миннувух полиэтилендалул ва пюрунтрал заводругу бушиву, азарунния ливчусса зузи кIантту дузал хьунсса сантгу душиву.
Вара кьини вице-премьер ивуна МахIачкъалаллал машлул хьхьирил портрайнгу. Ва портрал гендиректор Мурадхан Хидировлул бувсуна, ларгсса шинах бурувгун, чIаланну гьаз хьушиву кьай духхаву, ва нанисса дачIи шинал мутталий 20 процентрал гьаз хьушиву. Бувсуна предприятиялул буржру бакъашиву ва чIумуй налогру дулайшиву. Сергей Меликовлул махъ буллунни портрал каширду диялну ишла дуллансса ва ххишалану хайр ласлансса чаранну ккаклан.
Юрий Трутнев ивунни Дарбантуллал шагьрулийнгу. Шагьрулул мэр Хизри Абакаровлущал архIал кIичIирттавух ва Нарын- Къалалувух уккайхту, ванал бувсуна цанна дакI даркьушиву сантирай ва лябукку буну дуллалисса давурттай. КIицI лавгуна Дарбантуллал градостроительный план цайми регионнан ва шагьрурдангу ккаккиялунсса хьун аьркиншиврий. Тиккура дуруна Дарбант шагьрулул социал-экономика хьхьичIуннай шаву мурадрайсса масъалартту ххал бигьлагьисса совещаниягу.
П. Рамазанова
