Октябрьданул 14-нний ДР-лул экономикалул министрнал 1-ма хъиривчу Светлана Аьбдулкьадирова ва Жяматийсса советрал председатель Шагьимардан Мудуев хьунабавкьунни «Социально-экономическое развитие горных территорий РД» тIисса паччахIлугърал программалувух гьуртту хъанахъиминнащал.
Имара Саидова
Ва хьунабакьаву хьунни Ххунзахъиял администрациялий, Ххунзахъиял, Шамильский ва ТIилярат1иял районнал ишбажаранчитуращал.
Светлана Аьбдулкьадировал ишбажаранчитуран балжийну бувчIин бунни зунттал кIанттурдайсса районну хьхьичIуннай даву мурадрайсса программалувух гьуртту хьунсса куц ва паччахIлугърал чулухасса хIаллихшиннардая.
— Ялув кIицI лавгсса паччахIлугърал программалувух гьуртту хьуншиврул, Минэкономикалийн къабувкIунма, документру бюхъайссар тIайла буккан МФЦ-лийхчIин. Жу, документру ххал бивгьуну, дузал бан кумаг бантIиссар, — увкунни Аьбдулкьадировал.
Мудуевлул кIиц1 лавгунни, хIакьинусса кьинисса зунттал районнайсса тагьар хIисавравун ларсун, ва программа иширайну дузрайн дуккан даврийну хъунмасса мюнпат хьунтIишиву кьянатсса шартIирдай зунттаву ялапар хъанахъисса инсантуран.
— Программалул агьаммур мурадгу хъанахъиссар зунттал районнай лябукку буну зузисса ишбажаранчитурал чIарав бацIаву. ПаччахIлугърал программалувух хIала буххаврийну арцуйнусса кумаг тIалав бансса ххишаласса сантгу хъанахъиссар, — увкунни ванал.
Вара кьини ведомствалул делегация бивунни Бущихъиял райондалийсса ишбажаранчитурачIангу.
Шиккува бусан, паччахIлугърал программалувух гьуртту хьунсса документру кьамул буллалиссар октябрь зурул 27-ннийнин.
Балжийну паччахIлугърал программарттая кIул бан бюхъайссар Дагъусттаннал Минэкономикалул сайтрай (minec-rd.ru)
