Дагъусттаннал БакIчи Владимир Васильев гьуртту хьунни Аьрасатнал Федерациялул контрольданул ва хIисав-ккал даврил органнал каялувчитурал батIаврий. Муний ххал бигьлай бия «Дурну къуртал къадурсса строительствалул лагрурду чан даву» тIисса масъала.
БатIаву хьунни сентябрьданул 28-нний Национал библиотекалуву. Муний махъ лахълай, Владимир Васильевлул увкунни: «ХIакьину ДР-лул бюджетрай дур 170 млрд къуруш. Счетная палаталул бартдигьлагьиссар хъинну агьамсса давуртту. Зул бурж – агьалинал арцу инсантуран сахла давур». Республикалул каялувчинал тIимунийну, лябуккулувугу дур цила захIматшивуртту: «Жу хьхьичIванияр цIана сайки ацIлий чIяруну дуллай буру къатри ва социал объектру, му жапасса давур».
Владимир Васильевлул бувсунни коррупциялущалсса талатаврил давурттаву ДР-лул Счетная Палаталул материаллал хъунмасса кIану бугьлай бушиву.
Мунал тIимунийну, дурну къуртал къадурсса строительствалун хасну респулика уттигу личIлай дур билаятрай кIилчинмур кIанай. Муниха зийнма бусса бур Счетная Палатагу хIала-гьурттуну.
Гьашину январьданул 1-нний республикалий бакIуйн дуккан къадурсса диркIун дур 41 млрд къурушрансса 1354 объект, миннувух диркIун дур 1980 шинал дуллай диркIссагу. 2019 шинал бювхъуну бур цаппара объектру бакIуйн дуккан дуван.
«Жул мурад бур коррупциялущал талатаврияр ххишала, эконономика ххютула дуккан давугу. ЦIанасса ппурттуву жу 15 азара усру дуву ххютула уккан увну, налогру дуллали уллай буру, буллай буру 5 фабрика»,-увкунни В. Васильевлул.
Яла махъ лавхъунни ДР-лул Халкьуннал Мажлисрал Председательнал 1- ма хъиривчу СайгидахIмад АхIмадовлул. Мунал барча бунни Дагъусттаннал СП-лул зузалт идара сакин бувния шиннай 25 шин шаврищал.
БавтIминнайн лаивзунни АьФ-лул СП-лучIасса контрольданул ва хIисав-ккал даврил органнал Советрал СКФО-райсса отделениялул каялувчи Андрей Колесников. Мунал дурккунни АьФ-лул Счетная палаталул Председатель Алексей Кудриннул барча баврил адрес.
ДР-лул Счетная палаталул Председатель Билал Жяъпаровлул кутIану бувсунни СП-лул 25 шинай дурсса давурттая.
БатIаврий СП-лул хьхьичIунсса зузалтран дуллунни наградарттугу.
ХIадур бувссар
ХI. Аьдиловлул
