Сентябрь зурул 26-нний Дагъусттаннал паччахIлугърал Медициналул университетрал элмийсса кIулшивурттал цIушиннардал центрданий хьунни «Поколение ZOЖ» тIисса щалагу Аьрасатнал форум.
Имара Саидова
[dropcap]Ф[/dropcap]орумрал давривух гьуртту хьунни Дагъусттаннал БакIчи Владимир Васильев, ДР-лул ЦIуллу-сагъшиву дуруччаврил министр Жамалуттин ХIажиибрагьимов, «Волонтертал-медиктал» тIисса щалагу Аьрасатнал жяматийсса суккушиндарал председатель Павел Савчук, ДГМУ-лул ректор Сулайман Мяммаев.
Видеоконференциялийхчин форумрал гьурттучитуращал хьунаавкьунни Аьрасатнал Федерациялул ЦIуллу-сагъшиву дуруччаврил министрнал хъиривчу Олег Салагай, «Национал приоритетру» АНО-рал директор София Малявина, хIукуматрал органнал вакилтал ва волонтертал.
Форумрай цалчинмур кьини ххал бивгьунни «Демография» тIисса Национал проект иширайну дузрайн дуккан даврил хIакъиравусса масъалартту.
Онлайн-майданнай ккаккан бунни цIуллу-сагъшиву дуруччаву мурадрайсса мастер-классру. КIилчинмур кьини дунни штабирттал даврил хIасиллу.
Шиккува бусан, коронавирусрал пандемия дусса чIумал республикалий тIивтIуну буссия инсантуран кумагру буллансса волонтертурал штабру. Му ппурттуву дагъусттаннал жагьилтурал ккаккан бувссар, кьини дурксса чIумал инсантурал чIарав бацIан хIадурну бивкIшиву.
«Жува циняв цачIун хьуну» тIисса акциялул лагрулий 3 азарунния ливчусса волонтертал цачIун хьуну, кумагру буллай бивкIссар ахIвал-хIал кIюласса кулпатирттан ва оьрмулул бугьара хьусса инсантуран. Укунсса кулпатирттан жагьилтал ххилай бивкIссар дуки-хIачIия. Коронавирусрал инфекциялущал талатисса хIакинтуран кумагру буллай сайки 500 медик-волонтер зий икIссар азарханардайсса яла нигьачIаву думи зонардай. Волонтертурал дурсса ва буниялагу хъуннасса давур. Му форумрайгу лавайсса кьимат бивщунни волонтертурал бувсса захIматран.
Республикалул БакIчи Владимир Васильевлул кIицI лавгунни жагьилтурал бюхъу-каширду итххяххан даву мурадрайсса цIу-цIусса ххуллурду уттигу тIитIлантIишиву.
Жагьилтурахь насихIат бусласисса ихтилат бунни Олег Салагайлгу. Ванал бувсунни ларгсса шинал форумрай увагу 150 волонтер гьуртту хьушиву. «Гьашинумур форумрай гьуртту хьусса 2000-хъул волонтертураву бур блогертал, хIакинтал ва цаймигу экспертътал. Ва форумрал агьаммур мурадгу, цIуллу-сагъшиву дуруччаву хъанахъиссар. Мудан кIулну бикIан аьркинссар цIуллу-сагъшиву дурччаву-му жаваблувсса ва хъуннасса агьамшиву дусса даву хъанахъишиву»,-увкунни ванал.
