[dropcap]И[/dropcap]юльданул 7-нний ДР-лул ХIукуматрал Председатель Артем Здуновлул дунни ВКС-рал низамрайсса оператив штабрал батIаву.
Муний санитар-эпидемиологиялул иш-тагьарданул хIакъираву ихтилат бунни ДР-лул Роспотребнадзорданул управлениялул каялувчи Николай Павловлул. Мунал бувсунни му кьини сияхIрайн лавсун ушиву 8232 коронавирусрал къашавайсса инсан.
Николай Павловлул тIимунийн бувну, эпидемиялул иш-тагьар республикалий хъин чулиннай даххана хьуну душивугу хIисавравун ларсун ва ссуссукьушивуртту дукьан даврил 2-мур ятIапрайн бучIаврин хасъсса агьамми ккаккиярттугу щаллу хьуну дунутIий, хIадур хьун бучIину бур цаппара машлул объектру цIуницIа зий дайдишин. Мукунсса объектруну хъанай бур дахху-ласу дуллалисса 800 квадрат метралул лагрулул ттучанну ва цаймигу журалул машлул центрду, кучардавуссагу хIисавну. Мукунма зий байбишин ихтияр дуллуну дур оьрчIал багъирдахьхьун ва яслирдахьхьун, дянивми ва лавайми даражардал дуккаврил идарарттахьхьун, миннул кьамул бай комиссиярттахьхьун, кьатIувсса гъинтнил ларзурдахьхьун, кафердахьхьун ва рестораннахьхьун.
Ва ялагу, Николай Павловлул пикрилий, зий байбишин бучIину бур спортрал командарттан кьатIув гьавалий, творчествардал коллективирттан репетицияртту буллан, агарда ми лабораториярттай ххал бигьлан рязину бухьурча.
