ЦIарая мюхчан хьунсса чаранну ляхълай

[dropcap]Д[/dropcap]агъусттаннай коронавирусрал инфекция ппив къашаву мурадрайсса, ХIукуматрал Председатель Артем Здуновлул каялувшиннаралусса оператив штабрал заседаниялул лагрулий ххал бивгьунни вацIрацIух цIу къалачIунсса чаранну лякъаврил масъала.


Андриана Аьбдуллаева
Гьаз бувсса масъалалул агьамшиву кIицI лаглай, премьернал бувсунни махъсса ца гьантлул дянив республикалий цал архIал цIу ларчIшиву вацIлул кIанттурдайгу, ччюрклил бакIулуцIухгу.
Вай иширтталшиврий мугьлат бакъа ЧС-лул комиссиялул заседание дартIун, пожар лещан дан Аьрасатнал МЧС-рал вертолет Ростов-на-Дону шагьрулия дучIан дан багьшиву.

«ЦIу ларчIсса ишру хъанай бур агьалинал баччибакъашиву сававну, мукунна укуенсса иширттан савав хъанай бур кьаркьсса урттуцIух цIу щилащаву,» — увкунни ванал.
ЦIу къалачIунсса, ларчIун махъ му ччяни лещан дансса чаранну лякъаврил хIакъиравусса ихтилат бунни Дагъусттаннал ВацIлул хозяйстволул комитетрал председательнал къуллугъ чIумуйну биттур буллалисса Вагьаб АьбдулхIамидовлул.
Дагъусттаннал ХIукуматрал 2020-ку шинал март зурул 26-ннийсса Постановлениялийн бувну (№55), ккаккан дурну дур цIу лачIунсса нигьачIаву дусса чIун.

Гидрометеорологиялул федерал къуллугърал бусласимунийн бувну, июнь зуруй чIярусса шиннардий диркIссаннуяр ххишаласса дур Ухссавнил Ккавкказуллал федерал округрал вацIраву цIу лачIунсса нигьачIаву.
ХIакьинусса кьини республикалий цIу лачIунсса нигьачIаву 5 балданул системалий хIисав дурну, 4-5 классрал даражалийсса дур. Ххюва классрал даражалийсса нигьачIаву дусса районнай цIарая мюхчан шаврил ляличIисса тагьар баян бувну бур районнал бакIчитурал хIукмулийну. ЛяличIисса тагьар баян бувну бур Къизлардал, Тарумовуллал, Нугъайнал, Сулайман Стальскийл, Хасавюртуллал, Казбековуллал, Буйнакскаллал, УнцIукIуллал, Гергебиллал ва Сергокъалаллал районнай.
Комитетрал председательнал маслихIат бунни цIарая буруччаврил ляличIисса тагьар щалагу рес­публикалий баян бан.
Ци чаранну ляхълай бунугу, цIанасса чIумал республикалий арулла пожар хьуну дур. Миннува мукьра пожар гара кьини лещан дурну дур МЧС-рал пишакартурал, вацIлул пожардал центрданул зузалтрал ва кумагран бувкIсса кIанттул инсантурал хIарачатрайну. Уттигу лещан дан дурар шанна пожар: кIира — МахIачкъалаллал чIаравсса вацIравусса, цагу – Казбековуллал райондалийсса.
Комитетрал председательнал ихтилат къуртал хьуну махъ, Артем Здуновлул тапшур бунни виваллил иширттал министрнайн, ВацIлул хозяйстволул комитетрал зузалтращал цачIу цIу къалачIун ялув бацIаву дансса патруль ккаккан бан. ХIукуматрал Председательнал маслихIат бунни ва давривун волонтерталгу кIункIу бан.
Цала ихтилатраву МахIачкъала шагьрулул бакIчинал бувсунни Эльтав вацIлуву цIу ларчIсса иширая ва му лещан дан бюхъаврия.
ВаницIун бавхIуну, Артем Здуновлул кIицI лавгунни цIу ларчIсса кIанттурдайн МЧС-рал транспорт гъан хьунсса сант къадиркIшиву. Ванал тапшур бунни шагьрулул ва районнал бакIчитурайн цIу лачIунсса нигьачIаву дусса вацIлул кIанттурдал ялув бацIаву дан, къахьунмур хьурча, ми­ккун гъан хьунсса, щин ласун­сса сант рутан. Казбековуллал райондалул бакIчи ХIажимурад Мусаевлул бувсунни Дылым поселокрая шанна километралул манзилданийсса вацIраву цIу ларчIсса иширая ва му лещан дан захIмат хъанай бушиврия вацIлучIан машинартту гъан хьунсса сант дакъашиврийн бувну. Хъиннура захIматшивуртту хъанай дур вацIа ццунсса ва лахIунттуй бивхьусса бушиврул. Дагъусттаннал граждан обороналул ва ЧС-рал министр Нариман КазимахIаммадовлул бувсунни Таркилийсса пожар лещан дан бюхъарча, хъирив кьини вертолет Казбековуллал райондалийн тIайла дуккантIишиву.
Министрнал бувсунни махъсса ца-кIива гьантлул дянив кьаркьсса урттуцIух цIу ларчIсса 39 иш хьушиву. Ми лещан дансса техника диялну душиву, шяраваллан нигьачIаву дакъашиву. Бувсунни
цIана яла нигьачIаву думур участок Казбековуллал райондалий душиву.
Оператив штабрал заседания къуртал дуллай, кIицI лавгунни, республикалий ляличIисса тагьар баян баврицIун бавхIуну, вацIравун бюхъавай чанну занан аьркиншиву, хаснува машинарттай. НизамрацIун бавхIуну гуж бантIишиву патруль, хъун дантIишиву вацIраву цIу дишаврихсса аькIри.