ХIакинтал бигьалагантIиссар Каспи хьхьирил зуманицI

«Кьурукьру» тIисса Каспи хьхьирил зуманив бивхьусса Да­­гъус­ттаннал элмийсса ва цIуллу- сагъшиврул комплексрал генеральный директор,

Москавуллал паччахIлугърал университетрал профессор МахIаммад МахIаммадовлул баян бувссия «Слава врачам» тIисса Щалагу Аьрасатнаву нанисса акциялувух цувагу гьуртту хьунтIишиву, коронавирусрал инфекция сукку хьусса чIумал захIматсса шартIирдай зий бивкIсса медициналул зузалт уква бигьалаган цала комплексраву кьамул буллантIишиву.


Андриана Аьбдуллаева
Вай гьантрай комплексраву бигьалаган бувкIунни Аьрасатнал личIи- личIисса регионнаясса медициналул зузалтрал цалчинсса смена. Гьарица сменалий шикку ца нюжмардий бигьалагантIий бур 60 медициналул зузала. Сентябрь зуруйн бияннин комплексраву кьамул бантIий бур аьмну 500-ннийн бивсса медиктал.

Медициналул зузалт кьамул буллалисса мажлисрай гьуртту хьунни Дагъусттаннал ХIукуматрал Председательнал цалчинма заместитель Анатолий Карибов. Дагъусттаннал БакIчи Владимир Васильевлул, Дагъусттаннал ХIукуматрал ва Халкьуннал Мажлисрал цIания вице- премьернал барчаллагь увкунни цала къатта- къушругу кьабивтун, оьрмулун ва цIуллу- сагъшиврун нигьачIаву дусса захIматсса шартIирдай зий хъуннасса чувшиву ва пишакаршиву ккаккан дурсса хIакинтурахь. Ванал мукунма барчаллагь увкунни ва ххаллил­сса даву дан дакIнин багьсса комплексрал гендиректорнахь. Медициналул зузалтрахь барчаллагь тIисса, ми лахъа- хъун буллалисса ихтилатру бунни Дагъус­ттаннал цIуллу- сагъшиву дуру­ччаврил министр Жамалуттин ХIажиибрагьимовлул, цIуллу- сагъшиврул масъаларттал ялув зузисса Халкьуннал Мажлисрал член Зумрут Бучаевал. Ахирданий ихтилат бунни комплексрал генеральный директор МахIаммад МахIаммадовлул. Ванал бувсунни ва даву дан цанма пикри бувтшиву 45 шинай шяраваллил кIанттурдай хIакинну зий диркIсса цала ниттил.
— ЦIана ттул нину къашавай дур. Гьарица кьини цIусса хавардах вичIилий, хъювсул дуклан дикIайва. Цила коллегахъайн гуж багьлагьисса куц чIалай, ца кьини ниттил увкуна ттухь: «Тай инсантуран барчаллагьран ци-бунугу барча хъина», — куну. Та захIматсса тагьарданий зий бивкIсса инсантал хьхьирил зуманив бигьалагарча ххуйну хьунссия тIисса пикри хьуна ттунгу, — тIий, буслай ур МахIаммад МахIаммадов.
Шиккува кIицI лаган, ва акция буллалиссар Дагъусттаннал БакIчи Владимир Васильевлул кабакьулийну.