[dropcap]Ч[/dropcap]чянияцIара шиннай дуссия ттул ччаннал сакъатшиву – артроз. ЧIун-чIумуй хъин дан азарханалийгу уттуишайссияв, шаппагу даруртту канай икIайссияв.
Ца ппурттуву, цивхьуссияввагу къакIула, агьра Дагъусттаннал Ортопедиялул ва травматологиялул азарханалийн урчIамур ччан, хъинну бугу-бурувххуну, лув бизан къахъанай. Гикку на Ортопедиялул центрданул хъунама хIакин Юсуп Губуловлул тапшур унна жагьилсса хIакинтурайн – лас ва щарну хъанахъисса МахIачлуйн ва ПатIиматлуйн. Вай бур Ккуллал шяраватусса.
МахIачлул 2017-ку шинал къуртал бувну бур Дагъусттаннал медуниверситет. Зий ивкIун ур «Лекарь» тIисса частный поликлиникалий травматолог-ортопедну. Мичча увцуну ур цIана цува зузисса кIанттайн.
Цалва пиша ххуйну кIулшиврущал, МахIач, къашайшалтрал ялув ацIайсса, хъинну захIмат байсса пишакар ур. ЧIявуну, цала операция бувсса инсан ци тагьарданий урив ххал ан, даврий акъасса чIумалгума учIай. Хъун бакъасса мутталий МахIач чIявучин кIулхьуну ур ка куклусса, элму ххуйну кIулсса хIакин хIисаврай.
МахIачлул кулпат ПатIиматгу бувну бур Ккуллал шяраву. Школа къуртал бувну бур 2012 шинал мусил медальданий. Мура шинал дуклан бувххун бур Дагъусттаннал медуниверситетравун. Хьуну бур ПатIиматлуя травматолог-ортопед.
ЦIанасса чIумал ва бур цуппа зузисса клиникалий ца яла жагьилмур специалист. Ванил даврия уртакьталгу, къашайшалтгу рязину бур. КIюрххила пиш-пишгу тIий буххайссар ПатIимат къашайшалтрачIан. Цума-цаннахь цIуххинтIиссар хьхьу цукун дуртссарив, даруртту бакьлакьиссарив, къабакьлакьиссарив, ххал дантIиссар къашайшалал тагьар.
ХIасил, цаннацIун ца бавкьусса, цаннан ца давривугу кумаг буллалисса, дахIалай чинсса чут бур МахIач ва ПатIимат Магьдиевхъул. Зу дуллалимуницIун Занналгу кабакьиннав, зу цанная ца щалихханнин битаннав!
ХIусайн Давыдов,
ш. ЧIурттащи
