МютIину дур ванайн захIматсса цIуцIавуртту

2013-ку шинал на «Илчи» кказитрайн чивчуссия МахIачкъалалив, лазер ва цIусса технологияртту ишла дуллай, инсантурал яру хъин буллалаврия. Му чIумал чIявусса инсантурал цалва яруннил азар (катаракта) хъин дурну бувкIуна. Макьала дурккунал ттухь барчаллагьгу увкуна.


Вана уттигу «Илчи» кказитрайн чичлай ура мува мурадрайсса цамургу макьала. Март зуруй, кIюрххицIунай, на, ттула къатрая арх бакъа­сса хьхьирийн игьалагангу лавгун, махъунай увкIсса кIанай, цакуну, 9-10 минутIрал дянив, урчIамур ччаннал никирай-ччатIи кутук хьуну бурувххуна. Хирургиялул мазрай мунийн слоновость учай, яни пилданул кунмасса ччан, куну. Му дия, дахьра коронавирус дур т1ар тIий, чаляв багьсса чIун.
Ттул ликкурайсса ва азаруннийн хьхьичIра артроз учайссия, утти гоноартроз тIий бур. Вакссава укун ччан хьхьичIва къабуруххайссия. Мяйжаннугу, на нигьа увсунав, анаварну аьнтсса цIил щин дурну, миннуву бишав ччан.

Анаварсса кумаграл хIакинтуралгу увкунни: «Циняв азарханарду коронавирусрайн хIадур буллалиссар, укунмасса (плановые) къашайшалтгу кьамул къабуллалиссар», — куну.
На кIива зуруй, чачIав кумаг бакъа, шаний ливчIунав, гужсса къювулущал ва дурухлулущал.
ЧIаххуврай ялапар хъанай уссия ца даргиричу. Мунал оьвкуна Республикалул БакIчинал «Горячий линиялийн». Мугьлат бакъа бувкIуна хIакинтал, циняр анализру дансса оьгу лавсун, навагу Травматологиялул азарханалий уттуишин увнав — хирург, ортопед-травматолог Губулов Юсуп МахIмудович зузисса отделениялий.
Бусанна ваная кутIану: МахIмудлул арс Юсуп увну ур 1959-ку шинал Ккуллал шяраву.
1977-ку шинал Юсуплул мусил медальданущал къуртал бувну бур Ккуллал дянивмур даражалул школа.

1983-ку шинал ятIул дипломращал къуртал бувну бур Да­гъусттаннал Медакадемия. Яла ва тIайла увккун ур Псковуллал областьрайн. Тикку Травматологиялул отделениялул хъунаману зий ивкIун ур. 1991-ку шинал Дагъусттаннайн зана ивкIун, «Травмацентрданий» зун ивкIун ур. 2009-ку шиная шийнай зий ур Ортопедиялул отделениялул хъунаману.

Ванан х1алал дурну дур «Дагъусттаннал лайкь хьусса хIакин» тIисса цIагу.
ЦIанасса ппурттуву Юсуп зий ур ларсъсса цIардан лайкьну, ларайсса технологиярттацIун бавхIусса, зах1матсса операцияртту буллай, яни зия хьусса суставран кIанай искусственнай­сса бихьлай. Буккултран кIулну бикIан, вай операцияртту бан хьхьичIва дагъусттанлувтал занай бивкIссар, квотардагу ларсун, Саратоврайн, Москавлив, Санкт-Петербурглив.

Жулла районнай ризкьи-кьинилуха, хъу-лухччинуха зузисса халкьуннал дянив бур ччаннал цIуцIавуртту дусса чIявусса инсантал. Жул ЧIурттащиял шяравугума ур, мукун суставрду зия хьуну, зун-занан къахъанахъисса арула-мяйя инсан. Ми операцияртту ва хъин бавуртту дуллай ур гьунар бусса, ка сававсса хирург – Губулов Юсуп МахIмудлул арс.