Шарип Шарипов ивтунни ДР-лул шяраваллил хозяйствалул министрнал 1-ма хъиривчуну

Шарип Шарипов

ДР-лул ХIукуматрал Председатель Артем Здуновлул мартрал 3-нний бувсса хIукмулийну ДР-лул Шяраваллил хозяйствалул ва бакIлахъиялул министрнал цалчинсса хъиривчуну ивтунни Шарип Шарипов.

[dropcap]И[/dropcap]смяиллул арс Шарип Шарипов увссар 1964 шинал июльданул 23-нний ЦIуссалакрал райондалий Чапаевуллал шяраву, Хъусрал-ЧIаратусса нитти-буттал кулпатраву. Шяраваллил хозяйствалул техникум къуртал бувну махъ зий ивкIссар Тамбовуллал улклуй «Волна революции» тIисса колхозраву бригадирну.

Муния махъ марцIсса ххювардай ванал къуртал був­ссар Москавуллал Тимирязевлул цIанийсса шяраваллил хозяйствалул академия ва Ростовуллал паччахIлугърал экономикалул университет.

Шарип Шарипов ур экономикалул элмурдал доктор, АьФ-лул агропромышленностьрал комплексрал хIурмат бусса зузала. 1991-1993 шиннардий стажировкалий зий ивкIссар США-наву.
2013 шиная 2015 шинал ахирданийн ияннин зий ивкIссар Дагъусттаннал ХIукуматрал Председательнал хъиривчунал къуллугърай. Муния махъ «Югагрохолдинг» тIисса теплицардал комплексрал директорну уссия. Ва Дагъусттаннал паччахIлугърал халкьуннал хозяйствалул университетрал экономикалул кафедралул профе­ссорди.

«Илчи» кказитрал редакциялул чулухату дакIнийхтуну барча буллай буру Шариплухь цIусса къуллугъ ва чIа тIий буру цIу-цIусса хьхьичIуннайшивуртту!