[dropcap]В[/dropcap]ай гьантрай «Домашний» каналданий ккаккан бунни «Двигатель внутреннего сгорания» тIисса къамядия. Муниву агьаммур роль дугьлагьисса актриса Елизавета Майская чIярусса цайми
кинордайнугу кIулну бикIантIиссар тамашачитуран, амма нажагьссаннан бакъа къакIулхьунссар ва лакку душ бушиву, ванил фамилиягу КьурбанмахIаммадова душиву.
Андриана Аьбдуллаева
Бувну, хъунма хьуну бур Елизавета Украиннаву. Ванил ниттил чулухасса мархри Украиннавасса бур. Буттал ппу КьурбанмахIаммадов Юсуп Къичурлухиял (Чапаевкаллал) шяравасса ур. Танийва украин душгу бувцуну тих мина дирхьуну дур, ва щала оьрму тих лавгун бур.
— Юсуп интернатрай хъуна хьуссар. Ванал ппу аьрая зана къавхьуссар, нинугу ччяни диркIуссар. Украиннаву ва ххуйсса къуллугъирттай зий икIайссия. Киеврай хъунмасса заводрал парторгну уссия. Махъсса шиннардий Бородяновка тIисса хъунмасса поселокрай Бугьараминнал къатлул (Дом престарелых) директорну ия. Тай шиннардий лавгссияв на тихун таначIан иян. Юсуп цIанагу тава поселокрай ялапар хъанай ур, — тIий, буслай ур вайннал гъанчу Абумуслим.
Вана ва Юсуплул арснал Пидурил душ бур Елизавета. Пидури Киеврай хъунмасса овощебазалул хъунаману зий ивкIун ур чIярусса шиннардий. Ванал кулпатгу украинка бур. Вай цIанагу Киеврай ялапар хъанай бур. Лакрал ва украиннал оь хIала бувхсса душниягу гьунар бусса актриса, телеведущая ва опералул балайчи хьуну бур.
Бувну бур Елизавета 1985-ку шинал Киеврай. Къуртал бувну бур Киеврайсса культуралул ва искусствалул миллатрал университетрал диктортал ва телеведущийтал шайсса факультет. Школалий дуклакисса чIумалва итххявхсса, гьунар бусса душ бивкIун бур. Гьуртту шайсса бивкIун бур личIи-личIисса конкурсирттай, концертирттай. Оьрмулул 14 шинаву багьну бур вокалданухун. Цалчинмур курсирай дуклакисса чIумалва зун байбивхьуну бур миллатрал телевидениялий. Дуклай бивкIун бур Украиннал Аьлимтурал къатлучIасса студиялийгу.
КIира шинай дуклай ва зий бивкIун бур Будапештлив, Венгриянал Центральный телевидениялий. 2001-ку шиная байбивхьуну Елизавета дачин дурну бур украиннал телеканалданий «Кинофан» тIисса, радиолий «Простые истины» тIисса авторский программарду. 2005-ку шинал Интер телеканалданийсса «Звездой сериала буду я» тIисса реалити-шоулий ххув хьуну, ванихьхьун дуллуну дур «Волчица» сериалданувусса агьаммур роль.
Елизаветал актриса хIисаврайсса карьерагу ва рольдания дайдирхьуну дур. Ванил дургьуну дур рольлу телетамашачитуран ххира хьусса «Возвращение Мухтара-5», «Возвращение Мухтара-8», «Стеклянная комната», «Мой папа летчик», «Криминолог» ва чIярусса цаймигу кинордаву.
Елизавета цIанагу ялапар хъанай бур Киеврай. Ванил ца арс ур. ЧIал къавхьуну цила пишалуцIун бавхIуну буттал ватандалийн Дагъусттаннайн бучIансса пикрилий бур. Му чIумал ванищал цищалагу хьунабакьин икьрал дарду. Умуд бур Дагъусттаннайнсса ванил аьрххи тIайлабацIусса хьуншиврийн ва аьрххилиясса асардал ххаллилсса киносуратру ва передачартту ляхъан даншиврийн. Ялугьланну.
