«Дяъвилул душру»

Даврил уртакьтуращал

Ххувшаврил 75 шинан
ва Хъаннил байрандалун хасну

Ттула чурххал хIал ххуйну бакъа, на хъин хьун лавгссияв Редукторный поселокрайсса ветерантурал госпитальданийн.

Ттущал цачIу хьуна шама ла­ккучу ялагу. Жу хавардай бунува, ца хъамитайпа гъан хьуну: «Зу лак бурув? — куну, цIувххунни. — Нагу 1-мур ЦIувкIратусса бура, МахIачкъалалив яхъанай бура», — куна ганил. Гихунмайсса ихтилатраву бувсуна циятувагу:
— Ппу 1942-кусса шинал дяъвилийн увцуну, зана къавхьуну, нинугу ччяни аьпалул хьуну, ЧIявсса детдомрай хъун хьуссара, — куна Написатлул.

Написат Маммаева

[dropcap]М[/dropcap]икку ттул хьхьичIгу дар­цIуна 1947-кусса шиная 1953-ку шинайн ияннин детдомрай бувтсса ттула оьрмулул суратругу, ттущала архIал хIукуматрал ччатIуй хъуни хьусса оьрмулул гьалмахталгу. Минная­сса чIявуми аьпалул хьуссар, уттигу сагъну цу-цума урвав тIисса пикригу бакIравун бувххуна. Тания шиннай ларгун дур 66 шин.
Написатлущал буллай бивкIсса ихтилатрава жун кIул хьуна га мартрал 8-нний бувсса бушивугу. Ччангу бивкIуна ганил оьрмулия чанну-ххину чичин, Хъаннил байрандалул кьинилуцIунгу бавхIуну.

[dropcap]Н[/dropcap]аписат бувну бур мартрал 8-нний 1937-кусса шинал 1-мур ЦIувкIуллал шяраву. Ванил нитти-буттал – Исраиллул ва ПатIиматлул кIия арс ва шанма душ бивкIун бур. Написат душвавраву хъунмур бивкIун бур. Ванил 5 шин хьуннин ппу дяъвилийн увцуну, зана къавхьуну ур. Нинугу 1944-кусса шинал аьпа­лул хьуну, Написат 1947-кусса шинал ниттиуссил ЧIявсса детдомрайн буллуну бур. Детдомрай бунува, ЧIявсса школалий 8-классгу къуртал бувну бур. Гьунар бусса, хIарачат ххисса Написат школалий бунагу, гания махъгу гьуртту шай­сса бивкIун бур райондалийгу, республикалийгу шайсса олимпиадарттай, хьхьичIунсса кIанттурдугу бугьай­сса бивкIун бур.
1956-кусса шинал бувкIун бур МахIачкъалалив, цила маэшатрал хъирив, даврийн буххан.

Жагьилний

Хъунмасса барчаллагьрай бур Написат цила захIматсса кьинилул чIарав авцIусса ЧIятусса Рамазанов МахIаммадрамазаннуйн, (аьпа баннав цал), га чIумал Гъумук прокурорну зий ивкIсса. Мунал кумаграйхчин Написат бувххун бур зун балугъирттал консерварду дай­сса заводрайн. Зийгу бивкIун бур микку 46 шинал мутталий. Цив бияв тIар сайки циняв «дяъвилул душру».
Зузиссаксса хIаллай Написатлул хIалал дурну дур чIярусса бахшишру, грамотартту. Ва бур захIматрал ветеран. Написатлул, хъунигу бувну, чивун буккан бувну бур шама арс ва ца душ.
Хъунмасса барчаллагь вин, яхIлил бутIа ххишаласса зунттал душ, цайминнан эбратранну бувтсса оьрмулухлу! Ина кунмасса хъаннийри дарцIуну дусса ва дуниял. Барча вил кIирагу байран!

ЧIятусса АьвдурахIманхъал ТIалхIат,
детдомрал уссу