Халкьуннал творчествалул «Ссурулккуртта»
Дагъусттан Республикалул Халкьуннал творчествалул къатлул чIярусса давуртту дуллай бур жула ппухълунная бивсса культуралул ирс буруччаву мурадрай,
миннувух – конкурсругу. Ва цимигу шинни халкьуннал творчествалул «Радуга» тIисса цIанилумур конкурс буллайгу.
Вай гьантрай байбивхьуну, ва шинал октябрьданул 25-ннин кьамул буллалиссар «Радуга» тIисса цIанилусса ХVIII визуал творчествалул регионнал дянивсса конкурсрай гьуртту хьунсса аьрзри. Гьашинумур конкурс буллай бур Бюхттулсса Ххувшаврил 75 шинан хасну.
Конкурсрай гьуртту хьун бюхъантIиссар ччиманаща, му ци касму-сянатрал заллу ва оьрмулул ци шиннал унугу.
Конкурсрайн тIайла дуклакисса давуртту, видеопрограммартту дикIан аьркинссар халкьуннал культура, халкьуннал искусство, багьу-бизу, аьдатру дуручлачисса инсантураясса.
Билаятрал Президентнал 2020 шин «Памятьрал ва славалул» шинну баян бувнавхьур, оьрчIру ва чIава жагьилтал Хъун дяъвилий совет инсантурал дурсса виричушиврий тарбия шаву мурадрай, кьамул дуллалиссар «Моя Победа» номинациялийнсса видеофильмругу.
Конкурсрайн гьан дурсса видеофильмрттан кьимат бишлантIиссар 5 номинациялий, гьарца номинациялий буссар 1, 2, 3 кIанттурду ва гран-при. Язими видеофильмру ккаккан дувантIиссар «Дагъусттан» ГТРК-лий ва «Дагъусттан» РГВК-лий.
Конкурс буллалиссар ДР-лул Культуралул министерствалул ва Республикалул Халкьуннал творчествалул къатлул, Аьрасатнал Халкьуннал творчествалул къатлул, «Дагъусттан» ГТРК-лул ва РГВК-лул ва мукунна цаймигу сакиншиннардил ва союзирттал кабакьаврийну.
«Культура-онлайн»
Республикалул шагьрурдал ва районнал культуралул идарарттайн оьвтIий бур информациялул даврил Республикалул «Культура-онлайн» IV конкурсрай гьуртту хьун. Конкурс хьунтIиссар «Памятьрал ва славалул» шинал лагрулий ва Бюхттулсса Ххувшаврил 75 шинан хасну.
Конкурс буллалиссар республикалул культуралул идарарттал информациялул къуллугъирттал даву щирикIин дуваву, СМИ-рдаву халкьуннал байранну, халкьуннал янна-ка, канил пишарду машгьур баву, махъа нанисса ник ватан ххирану тарбия шаву мурадрай.
Конкурсрай культуралул идарарттал информациялул давурттан кьимат бишлантIиссар «Веб-сайт», «Социальные сети», «Информационные материалы, опубликованные в печатных или электронных СМИ», «Фотоконкурс» номинациярттай.
Конкурсрайнсса аьрзри ва давуртту кьамул дуллалиссар ва адресрай:
367010, ш. МахIачкъала, РДНТ МК РД, ул. О. Кошевого 35, «А»,
е-mail:oio-rdnt@mail.ru, тел.: 8-988-435-50-43.
