[dropcap]Б[/dropcap]архъаллал тIахIунтту – оьрчIал каруннах Республикалул Халкьуннал творчествалул къатлул зузалтрал Дагъусттаннал шагьрурдал ва шяраваллал школардай чIун-чIумуй бувайссар халкьуннал канил пишардал мастер-классру.
Ми буллалиссар махъа нанисса никирангу буттал буттахъал касму-сянатирттая кIулну бикIаву, ми оьрчIал дянив машгьур баву мурадрай.
Бархъаллал тIахIунтту даврил мастер-класс Республикалул оьрчIал «Журавлик» тIисса цIанилусса санаторийлий бувунни РДНТ-лул пишакар Земфира Мусаевал. Муний республикалул шагьрурдаясса ва шяраваллавасса 20-нния ливчусса оьрчIал гьурттушинна дунни.
Мукунмасса мастер-класс бунни Земфира Мусаевал ва Зугьра Гьаруновал ургала акъа ливчIсса № 4 школа-интернатрайсса (ш. МахIачкъала) оьрчIангу.
«Миллатирттал яннардавусса ниттихъул
ва оьрчIру»
Укунсса цIанилусса, щалагу Аьрасатнал лагрулийсса фотоконкурсрайнсса аьрзри кьамул буллай байбивхьунни. Конкурсрал хIасиллу дувантIиссар ва шинал мартрал 1-нний Москавлив «Конгресс-Холл» ЦМТ-луву фотовыставкалий. Му выставкалий ккаккиялун дирхьуну дикIантIиссар финалистътурал рирщусса 50 сурат, цивгу заочнаймур турданий язи дургьусса. Миннувату ххув хьусса 10 даву язи дугьантIиссар. Конкурсрая гьарта-гьарзану кIул буван бюхъантIиссар ва сайтрай: www.ethno-photo.com.
Дагъусттан Республикалун 99 шин шаврин хасну
ДАССР сакин дурну 99 шин шаврин хасъсса шадлугъру хьунни жулла республикалул шагьрурдал ва шяраваллал культуралул идарарттай. Миннувух гьуртту хьунни муниципалитетирттал каялувшиннарду, дуклаки оьрчIру ва оьрмулул бугьарами.
ЦIусса Хушетрай ва Богатыревкалий тIурча, хьунни му кьинилун хас бувсса ккуркки-столлу. Республикалул тарихраясса бусавурттацIун, ва кьини шикку дакIнийн бивчуна Дагъусттаннал халкьуннал вирттал, миннавух – ПартIу ПатIима ва Хан-Муртазялигу.
ХIадур бувссар
Бадрижамал Аьлиевал
