Симандалийн пиш зана битайсса операция

[dropcap]В[/dropcap]ай гьантрай МахIачкъалалив РКБ-лул Ожоговый центрданий хьунни «Пишлил операция» тIисса рахIму-цIимилул фондравасса личIи-личIисса

паччахIлугъирттаясса пластикалул хирургтурал захIматсса щавурду хьусса къашайшалтрай операцияртту бувсса акция.


З. АьбдурахIманова
ДР-лул ЦIуллу-сагъшиву дуруччай министерствалул пресс-къуллугърал бусаврийну, шанма гьантлул мутталий хIакинтурал 27 къашайшалан кумаг бувну бур.

Ва чирилул фондрал хъунмур Татьяна Пошехонова хъунмасса барчаллагьрай бур ДР-лул цIуллу-сагъшиву дуру­ччаврил министр Жамалуттин ХIажиибрагьимовлуйн ва республикалул хъун азарханалул каялувчитурайн ва акция дан кабакьаврихлу.

Акция сававну ххуйсса кумаг хьуну бур чурххай, лажиндарай щавурду лирчIсса мюрщи оьрчIан. Вайннан чIявуминнан акциялия бавнугу бур социал сетирдава. Аьмну кумаграл хъирив хирургтурачIан увкIун ур 37 инсан, вайннава 27-ннай операция бан багьну бур.