Ларгсса ххуллункьини, январь зурул 18-нний, Да­гъусттаннал БакIчи Владимир Васильев журналистътуращал хьунаавкьунни. Миккун оьвкуна жуйнгу, «Илчилул» хъунама редактор Руслан Башаевлуйн ва ттуйн.

БатIавривух гьуртту хъанай бия ХIукуматрал хъунама Артем Здунов, ХIукуматрал ва БакIчинал Администрациялул хъунама Владимир Иванов, информатизациялул, связьрал ва массовый коммуникациярттал министр Сергей Снегирёв, ХIукуматрал ва БакIчинал Администрациялул Информациялул управлениялул хъунама Зубайру Зубайруев ва цаймигу къуллугъчитал. Хьунабакьаву дархIуну дия Аьрасатнал Президент В. Путиннул РисалалуцIунгу, Аьрасатнал печатьрал кьинилуцIунгу, цIушинал дайдихьулуцIунгу. Журналистътал барча буллай, бакIрайва кIицI лавгуна Владимир Васильевлул жяматрал оьрму хьхьичIунмай хъит учин бувавриву, социал институт хIисаврайгу, мюнпатрансса ярагъ хIисаврайгу, СМИ-рдал бияла хъунмасса бушиву, ттизаманнул информацион технологиярттал журналистътурал каширдугу хъуни дуллалишиву. Ларгсса шиналсса хIасиллу дуллай, агьамми кIанттурду хIисавравун ласлай, БакIчинал бувсунни аьмну дурмур ва дуллалимур гьанулун ларсун мадарану хьхьичIунмай хъит увкушиву, экономика «ххютула» дуккан дурну, налогру дачин дуван, социал тIалавшиннарду дузал дуван биялсса хIарачат бувшиву, дурсса давурттая агьалинахь буслай, журналистъталгу уртакьну зий бивкIшиву. Бувсунни «Мой Дагестан» проектругу сантирай бартдиргьушиву.
Аьрасатнал Президентнал Рисалалийн увккун, В. Васильевлул бувсунни ниттил капиталданул тема социал сетирдай­сса Дагъусттаннал сегментрай личIинура машгьурну душиву.
— ЖучIава ларгсса шинал бунни 46 000 оьрчI, миннавату 13 000 – цалчинми оьрчIру, ни­ттил капиталдануя миннан ххуй­сса кумаг хьунссия, на республикалийн кулпатирттан кумагран­сса арцу дучIан най чIалай, ххари хъанай ура, — увкунни ванал.
Казбековский райондалий оьрчIан садикру биял хъанай бакъар, райондалий электрон учирданий 1630 оьрчI бур, укун­сса тагьар сайки гьар шагьрулий ва райондалий дур тIисса суалданухьхьун жаваб дуллай, Артём Здуновлул бувсунни «Демография» программалийн бувну гьашину Дагъусттаннай мюрщултрансса 37 ясли ва 20 садик бувансса ният душиву, дуван­сса кашигу душиву, подрядчикгу хIадурну ушиву. Республикалул хъунаманал чIурчIав дурна, агар транспортрал налог 100 процентрал дузалну датIирча, 2 миллиард ххуллурду бакьин буван муниципалитетирттайн бичинтIишиврия.
Журналистътурал суаллу бия къашавайми уква­сса дарурттал дузал баврицIун бавхIуссагу, билаятрал Конституция баххана баврияссагу, Аьра­сатнал цIусса премьер-министр Михаил Мишустин итаврияссагу. Вай циняв суаллахьхьун балжий­сса жавабру дуллай бия республикалул хъуними сайки кIира ссят­рал мутталий.
ДакIнихтуну ххари хьунав МахIачкъалаллал аэропортрайн, Уйташ къатIий, АхIмад-Хан Султаннул цIанийсса аэропорт тIун аьркинссару учайхтугу.
Ахирданий республикалул хъунаманал хьхьичIунсса журналистътуран дуллуна Барчаллагьрал грамотартту. «За значительные успехи и профессиональные достижения» грамотартту дуллунавух бияв нагу. Миллат­рал прессалун лахъсса кьимат бищавур вагу. Грамота дуллуна ЦIуссалакрал райондалул «Заманалул чIу» кказитрал корреспондент Шавлукьова Мариянангу.