Декабрь зурул 22-нний ккаккан дурну дур жула билаятрай Энергетикнал кьини. ХIакьину чани ишла къабайсса цавагу къатта-къуш бакъар.
Амма жула зунттавусса шяраваллавун чани бувкIсса 1960-ку шиннардийри. Муния махъ ларгун дур 50-нния лирчусса шинну.
Уттигъанну на Ккуллал райондалийсса шяраваллу чаннал дузал дуллалисса подстанциялул хъунама мастер Серегин Шамхаловлущал хьунаавкьуссияв.
— Цукунсса хьур ларгсса шин, ци бювхъур дуван, ци къабювхъур?
— Махъсса шиннардий чIявусса чани жяматрал ишла буллалаву ххи хьуну дур. Му иш хIакьину бавхIуну бур къатта-къушлий ишла дайсса циняв затру токрай зузисса душаврицIунгу. Ялагу, жунма кIулсса кьяйдалий, Ккуллал райондалийн, хъинну чанну бакъа, таксса инсаннаща ласун бюхъайсса хъуручI букIлай бакъар. Мунийн бувну къатта гъили бавугу хъунмурчIин токрайхчинсса хъанай дур. Мунийну чаннал ххаллайн гуж багьлай, гай ччучлачисса ишру хъанай буссия цаппара шяраваллаву. Вихьуллал ва Хъюйннал шяравусса ххаллу гьануну даххана дуварду, ганзсса ххаллу дирхьуну. Аьмну ми хьунни 860 метра. Бакьин барду шяраваллавусса 12 трансформатор. Баххана буварду Ккул-Хъусрал чулийсса зунттавусса пирмардайн нанисса тталлугу.
— Жула райондалийн дузалну бучIайссарив аьркинссаксса чани?
— ЖучIанма бучIан аьркинну бур 35 азарва киловат. Жунма чIалай бурхха, махъсса шиннардий зунттавун чанну дакъа гъараллу лачIлай дакъар, кIинттул, цал-кIил буварча бакъа, марххалагу къабувай. Мунийну жула шия нанисса неххайсса щингу чанну личIлай дур. Мукунмасса иш бур яруссаннал чулуха нанисса неххардийгу. ЖучIанма чани бучIайссар Гергебиллал электростанциялия. Гиккунни нанисса жула нехругу. Щин чанну нанийни, турбинарду дузалну зун къабикIайссар. Амма, Гергебиллая нанимур чани чанну буни, Лаващиял ва Агъуллал чулуха наними ххаллавух дузал байссар, 35 бакъахьурчагу, дузалшиву шай.
— Зул подстанциялийсса даву цукун хIасул дурну дуссар?
— Жу жаваб дулайссар муштаринал къатраву дирхьусса счетчикрачIан бияннин нанисса чаннал. ЖучIа буссар кIива оператив бригада. Вай, хьхьу-кьини дакъа, подстанциялий дежурствалий бикIайссар, ца лагайхту, цамур букIлай. Ххал дурцун ягу цамур иш хьусса кIанайн, баян байхту, лагайссар.
— Щил цIарду кIицI дан хьунссар вичIава зузисса зузалтрава?
— Шикку зузисса ацIния урчIагу зузала цала даву ххирасса ур. ЦучIав личIи уван ттуща къахьунссар. Цинявннал цIарду кIицI дуллангу къашайхха. Амма кIицI къадурну кьаритан къахьунссар ва даврий зувинния лирчусса шиннардий зузисса Шамхалов Рамазаннул цIа.
— ЦIусса шинацIун бавхIуну, ци чIа учинна вила зузалтран, райондалул жяматран?
— Гьай-гьай, на чIа тIий ура жула инсантуран цIуллушиву, тирхханну, оьрчIал ххари баву. Ялагу, харжирдал жипру кIу даву. Учин ччива, кIинттул ток чIявусса харж хъанахъийни, инсантурал цала шардасса, аьркинний ва къааьркинни лархъсса, лампочкарду лещаву.
Барча ЦIусса шин!
Ихтилат бувссар
ХI. ХIусайновлул
