[dropcap]Я[/dropcap]нварьданул 19-нний ДР-лул ХIукуматрал Председатель Артем Здуновлул Къизлардай дунни тиккусса чапалсса щин сававну ххюттукалул азарду хIасул шаврил
хIакъиравусса батIаву. Муний гьуртту хьунни профилсса министерствартту ва идарартту, мукунма шагьрулул каялувчитал.
Шагьрулий зий бур вай гьантрай цаппара идарарттая сакин хьусса комиссия, миннуй каялувшиву дуллай ур ДР-лул ХIукуматрал Председательнал 1-ма хъиривчу Анатолий Карибов. Мунал тIимунийну, цIанасса ппурттуву азарханалий ур 160 инсан, миннавату 89 – оьрчI-бакI. Ххюттукалул азарду дирсса чIявуми сияхIрайн лавсун бур шагьрулул Черемушки тIисса райондалий щара лахъан къадурсса щин хIачIаву сававну. Турбардавух нанисса щинал дезинфекция дуллай бур, цаппара насосрал станциярттайгу дихьлай бур кIунтIай тIисса журалул дезинфекциялул система, ливчIми станциярттугу мукунма дузал бувантIий бур цаппара гьантрал дянив. ЦIанасса ппурттуву буллай бур цIусса щинаххуллугу (водовод). Шагьрулул азарду хIасул хьусса микрорайондалий инсантурал къатравун занай, къашавай хьуми кIул буллай бур медучреждениярттал студентътал ва волонтертал.
Яла ДР-лул Роспотребнадзорданул каялувчинал хъиривчу Лариса Пантинал бувсунни азарду сукку хьусса микрорайондалийсса 2 школа лакьинсса пикри хьуну бушиву. ХIукуматрал Председательнал бувсунни къарязишиву школартту лакьин. «Ттун бувчIлай бакъар школартту циван лакьин аьркинссарив. ОьрчIру шаппа бухьурча, къашавай шавриясса нигьачIаву дакъассарив, азарду щинацIун дархIуну душиву исват бувну бунува? Школартту лакьаврил мурад цир, миккун марцIсса щин ххилан тIий бухьувкун?» — увкунни Артем Здуновлул. Къизлардал бакIчи Александр Шувалов авкьунни премьер-министрнал увкумуницIун. Премьер-министрнал тапшур бунни циняв школарттал оьрчIру марцIсса щинал дузал буллан паччахIлугърал арцух. Агана школартту лакьирча, 2 азаллийсса оьрчIру цахунма цивппа бивчуну личIан най бия.
Мунияту ДР-лул тIабиаьтрал луртаннал министрнал Роспотребнадзорданул вакилнахьхьун суал буллунни: «Школалий бухьурча, оьрчIру азардая бурувччуну бикIанссар, шаппа бухьурча, миннал нитти-буттал ми цукун буруччинссар?» – куну. ДР-лул цIуллушиву дуруччаврил министр Жамалуттин ХIажиибрагьимовгу авкьунни премьер-министрнал школартту къалакьаврил хIакъираву увкумуницIун. Мува пикрилуцIун бавкьунни мукунма ливчIми министерстварттал ва идарарттал вакилталгу.
ХIадур бувссар
ХI. Аьдиловлул
