ЦIусса шинал – цIусса ххувшавуртту

ЦIусса шинал цалчин­сса гьантрай Апанни КьурбанмахIаммадовлул цIа­нийсса ЦIуссалакрал район­далул «Эдельвейс» тIисса къавтIаврил ансамбльданул ларсунни ирглийсса ххувшаву.

Вай гьантрай Къабардин-Балкьарнал республикалий хьунни «Таланты Евразии – 2020» тIисса искусствардал творчествалул олимпиадалул конкурс.


Имара Саидова
[dropcap]М[/dropcap]икку гьуртту хьунни Да­гъусттаннаясса, Абхазнавасса, Авгъанисттаннаясса, Африканавасса, Египетнавасса, Индиянавасса, Яманинавасса, Туркманисттаннаясса, Кьилвалул АьсатIиннавасса, Адигайнава­сса, Ингушетиянавасса, Чачаннал республикалиясса, Ставропольлал ва Краснодардал крайрдая­сса, Аьшттарханная­сса, Москавлиясса ва чIявусса цаймигу шагьрурдаясса ансамбльлу. ЦIусса шинал дайдихьулий Кьилвалул Аьрасатнаву къавтIаврил искусство машгьур даврил олимпиада дуллалаву ххаллилсса аьдатравун дагьну дур.

Пахру бан лайкьсса иш бур вайксса коллективрду гьур­тту хьусса конкурсрай Ккавкказуллал къавтIавуртту машгьур дуллалисса ЦIуссалакрал райондалул «Эдельвейс» ансамбль хьхьичIххуттай ккаккаву. «Халкьуннал къавтIаву» тIисса номинациялий «Эдельвейс» ансамбльданул преподаватель Сулайманов Мурадлул бувгьунни 1-сса кIану ва вайннал ансамбль му олимпиадалул лауреатътал хьунни.
ЧIарасса никирал гьунарду аьлтту баврихлу барчаллагь баян бунни А. Кьур­бан­махIаммадовлул цIанийсса ЦIуссалакрал райондалул ис­кусст­вардал школалул директор Рашидат ХIасан­хIусай­новайн.

Гьуртту хъанахъиминнан кьиматру бишлай бия лавай­сса даражалул жюри. Мяйжаннугу, бигьану бакъая кувннаяр кув гьунарду бусса ансамбльлава язими личIи дуван.
Конкурсирдал ахирданий хьунни ххув хьуминнан личIи-личIисса бахшишру дуллали­сса шадлугърал мажлис ва гала-концерт.

«Таланты Евразии» олимпиадалул лагрулий хьунни мастер-классру, дусшиврул вечерду.
«Эдельвейс» ансамбльданул каялувчитал барчаллагьрай бур аьрххи-ххуллурдай цалва чIарав бацIлацIисса ва кабакьу буллалисса ЦIуссалакрал райондалул бакIчи ХIажи Айдиевлуйн, «Новолакское ДЭП №28» АО-лул директор Оьмар Жалаловлуйн, ЦIуссалакрал райондалийсса Аьрасатнал пенсион фондрал отделениялул хъунама ТIалхIат Исмяиловлуйн ва ЦIуссалакрал райондалийсса «Газпром межрегион Махачкала» АО-лул хъунама Гъази Сулиевлуйн.