Вай гьантрай республикалул информатизациялул, связьрал ва массовый коммуникациярдал министр Сергей Снегирёвлул хъуними редактортал бавтIсса совещаниялий «Дагпечать» ГАУ-лул цIусса
директорнащал кIул бунни. Ва Чапаевкаллал шяраватусса Сиражуттиннул арс Хайдакьов Юсуп ур.
П. Рамазанова
[dropcap]М[/dropcap]инистрнал барчаллагь увкунни уттинин кIа къуллугърай ивкIсса АьбдурахIим Каримовлухь, бувсунни ванал къабигьасса чIумал бакIрайн ларсъсса даву сантирай ва лябукку буну дуршиву.
«Утти жулва хьхьичI бур цIусса масъалартту, цIусса проектру бартдигьлан багьлай бур, шагьрулул транспорт дацIайсса кIанттурдайсса павильонну чIяву бан бур, дахханашиннарду дуваншиврулсса менеджертал тIалавну бур, циняв кказит-журналлу чIумуй буккултрачIан биян баву мурадрай даву дюхъан дуван багьлай бур», — увкунни Снегирёвлул.
Юсуп Хайдакьовлулгу бувсунни цува хьхьичI бавцIусса масъалартту сантирай ва лябуккулий бартбигьинсса хIарачатрай зунтIишиву.
Юсуп увну ур 1980 шинал Чапаевкалий, къуртал бувну дур Дагъусттаннал паччахIлугърал университетрал юристътал хIадур бувайсса факультет. 2017 шиная шинай зий ивкIун ур МахIачкъалаллал Кировский райондалул бакIчинал кумагчину, 2018 шинал кIара райондалул администрациялул управлениялул хъунаману ивтун ур.
ДакIнихтуну чIа тIий буру ванан цIусса къуллугърай тIайлабацIу ва даву лахъсса даражалийн гьаз дувансса бюхъу-тяхъа.
