[dropcap]В[/dropcap]ладимир Васильев гьуртту хьунни Оьрус­нал театрдануву хьу­сса Виваллил иширттал органнал зузалтрал кьинилун хас дурсса шадлугърай.

А. Аьбдуллаева
Мажлис тIитIлай, ихтилат бунни ДР-лул виваллил ишир­ттал министр Аьвдурашид МахIаммадовлул.
— Жун пахру буссар цIанихсса жула тарихрая. Гьарица чIумал кунма, хIакьинусса кьинигу жул зузалт, низамрал ва мюхчаншиврул къаралданий бавцIуну, дакI марцIну бартбигьлай бусса цала къуллугърал буржру, — увкуна ванал, цала ихтилат къуртал буллай.

Хъирив ихтилат бунни Да­гъусттаннал БакIчи Владимир Васильевлул. Ванал кIицI лавгунни республикалул Виваллил иширттал министерствалул цала даву тIайлану ва мюнпат буну дуллай бушиву.

-ХIакьину жучIара тахсиркаршивуртту 1,7-лла чанну дур Ухссавнил Ккавкказуллал Федерал округрайнияр, 3-лла чанну дур щала билаятрайнияр, — кIицI лавгунни В. Васильевлул ва барчаллагь увкунни ххуй­сса ккаккияртту чIалачIи дурсса зузалтрахь ва къуллугърал ветерантурахь.
Владимир Васильевлул гьаз бунни налогирттал масъалагу. Бувсунни 2018-ку шинал налогру 20%-рал ххишалану рартIшиву. Вай хъанай бур 6 млрд. арцул.

— Вай кьюлтIну щуруй диркI­сса, коррупциялуха зий диркIсса арцур. Миннух закондалул ххуттава бувксса къуллугъчитал, къатри дуллай, цанна ччимур ласлай бивкIссар. Коррупциялийн къарши бацIаврил даву къабигьассар. Цакуну цимурца даххана дан къашайссар. Амма дурмунил чIалачIи бунни ва даврия цуксса хайр буссарив. На мукIруну ура, шиная шинайн тIий, Дагъусттан тIутIайх бичавриясса, агьалинал багьу-бизу ххуй шавриясса хияллу бартлаглантIишиврий, — увкунни ванал.

Хъирив давриву хьхьи­чIунсса зузалтран дуллунни па­ччахIлугърал наградартту, Республикалул БакIчинал цIа ку­сса ссятру. Дуллунни Министерствалул чулухасса наградарттугу.
Ахирданий ккаккан дунни ххаллилсса концертрал программа.