Региондалул БакIчинал ххал бувунни АьФ-лул Президентнал дурсса тапшур бавуртту ЦIумадиял райондалий цукун щаллу дуллай бурив.
Вертолетрая Владимир Васильевлул ххал бунни Гигатли ва Кванада шяраваллаву цIуну буллалисса школартту. ДакIнийн бутан, вай буллалиссар Бущихъиял ва ЦIумадиял районну социал ва экономикалул чулуха итххяххан даврийн багьайсса масъаларттал лагрулий.
Гихунай Республикалул БакIчи ивунни Силди тIисса шяраву спорткомплекс буллалисса кIанайн. Микку дуллалими давурттая Владимир Васильевлухь бувсунни Аьрасатнал лайкь хьусса тренер Аьбдулманап НурмахIаммадовлул.
БакIчи мукуна ивунни Гуржиящалсса дазуйсса Лувмур Хваршини – Ялувмур Хваршини автоххуллу буллалисса кIанайн. Вагу хъанахъиссар билаятрал каялувшиндарал вай районну хьхьичIуннай даврицIун бавхIуну бувсса бигардавасса ца. Шиккува кIицI лаган, АьФ-лул ХIукуматрал хIукмулийн бувну, 2019 шинал Грозный- Бущихъи – Хъунзахъи – Араканнал майдан машиналул ххуллийсса кIира участок дакьин дуван ва Лувмур Хварниши- Ялувмур Хварниши ххуллул 4,4 км. лахъишиврийсса манзил щаллу бувансса арцу итадаркьуну дур.
ЦIусса спортзал
Вава аьрххилий Дагъусттаннал БакIчи Владимир Васильев гьуртту хьунни Бущихъиял райондалий Ансалта шяраву цIусса спортзал тIитIлатIисса шадлугърай.
Ва буллай байбивхьуну бур 2017 шинал республикалул инвестицион программалул лагрулий, республикалул бюджетравасса арцуцIух. Республикалул БакIчинал билаятрал каялувшиндарайнсса тавакъюрайн бувну, 2019-ку шинал дайдихьулия шинмай спортзалданунсса арцу итадакьлан бивкIссар федерал бюджетрава. Мунил хIасилну хьунни ва кьини тIивтIусса кIира зивулийсса спортзал.
Ва ххарисса иширащал шяраваллил жямат барча буван бувкIун бия СССР-данул ва Аьрасатнал спортрал лайкь хьусса мастертал, дунияллул даражалалу спортсментал.
Хьунаавкьунни къатрацIа хьуминнащалгу
Вара кьини Республикалул БакIчи хьунаавкьунни къатри ччурччусса Тисси-Ахитли шяраваллил инсантуращал. ДакIнийн бутан, 2019 шинал мартрал 1-нний, цIу дагьну, ва шяраву щаллуну ччувччуссар 11 къатта ва бачIину – 5 къатта, ялув магъи дакъа ливчIссар 51 инсан, миннава 7 – оьрчI. Хьусса заралданунсса арцу вай инсантуран дуллуссар ДР-лул ХIукуматрал ва ЦIумадиял райондалул луртаннал фондирттава.
Владимир Васильев ялтту увккунни цIуну дуллалисса къатрал, ихтилат бунни къатрацIа хьусса инсантуращал.
ЦIанасса чIумал шяраву мукунма щаллу хьуну бур цIу дагьсса чIумал зарал бивсса газопровод дакьин даврицIун бавхIуми кушурдугу. Республикалул БакIчинал бигарданийн ва Аьрасатнал МЧС ГУ-рал ххуллул карталийн бувну, ЦIумадиял райондалул администрациялул ккаккан дурну дур пожарданул резервуар дувансса аьрщи, бакьин бувну бур муничIансса ххуллурду.
Бадрижамал Аьлиева
