Нуруллагьлул арс Сяидов Сяид
Уттигъанну, захIматсса азаруннища ххассал ан къавхьуну, жагьилсса оьрмулий жуяту личIи хьунни хъинсса шяравучу Нуруллагьлул арс Сяидов Сяид.
Сяид увссар 1974 шинал Ахъушиял райондалийсса ЦIуликъяннал шяраву захIматкаштурал кулпатраву.
Ванал нину-ппу оьрмулухун, колхозраву захIмат буллай, хъу-лухччинуха, ятту-гъаттараха зий бия.
Хъунттатта Сяид Хъунмасса Буттал кIанттул цIанийсса дяъвилия зана къавхьуссар, Новороссийск шагьрулийсса уссушиврийсса гьаттаву увччуну уссар.
Бархъаллал дянивмур даражалул школа къуртал бувну махъ Сяид зий ивкIун ур ЦIуликъяннал колхозраву, ятту-гъаттаралсса буллай. Колхозру тири-хъири хьуну махъ ва зий ивкIун ур личIи-личIисса давурттай МахIачкъалалив ва Ростовуллал областьрай.
Сяид ия канил усттаршиву дусса, строительствалул давуртту ххуйну кIулсса инсан. МахIачкъалалив ивзун махъ домоуправлениялий зий икIайва.
Чув зий ухьурчагу, ххирану икIайва даврил уртакьтуран. Ванал инсаншиврия, аьчухшиврия, дакI-аьмал хъиншиврия буслан бикIайва ва кIулми цинявппагу. Оьрмулул жагьилсса унугу, Сяид хъунмасса захIмат бувсса, багьу-бизу кIулсса инсан ия. Ванан дазу-зума дакъа ххирая буттал шяравалугу, шяраваллил жяматгу, цинявппагу лакгу. Ванал махъ ливчIунни шанма мюрщисса оьрчI-душ.
Сяид дунияллия лагаврил кьурчIишиву кIидачIлай, жижара буллай буру ванал ниттихь Зайнавлухь, кулпатрахь, уссу-ссуннахь, оьрчIахь ва махъсса цинявппагу гъан-маччанахь.
Алжаннул ххари аннав, рухI хъинний дишиннав, махъминнал оьрмурдай барачат бишиннав.
ЦIуликъяннал шяраваллил жямат, дустал, гьалмахтал
Исмяиллул арс Къапиев Оьмар
Вай гьантрай аьпалухьхьун лавгунни ххаллилсса лаккучу, бусравсса Къапихъал кулпатрал арс Оьмар.
Увну ур Оьмар 1946-ку шинал май зурул 19-нний Гъумук. 1963-ку шинал Каспийскалий школагу къуртал бувну, Оьмар зун ивкIун ур Каспийскаллал №1 заводрай. 1964-ку шинал лавгун ур аьралуннаву къуллугъ бан. 1966-ку шинал къуртал бувну бур Аьралуннал ва хьхьирил флотрал радиотехникалул школа.
1968-ку шинал, аьрали буржгу лавхъун увкIун, цIунилгу тава заводрай зун ивкIун ур. 1972 шинал военкоматрал тIайла увккун ур ва дуклан Севостополлайн, мичмантал шайсса институтравун. 1973-ку шинал къуллугъ буллан айивхьуну ур МахIачкъалаливсса аьрали частьраву (42930). Оьмар ивкIун ур радиотехникалул къуллугърал хъунаману.
1976-ку шинал жамирдайсса дивизиялул пишакарну зун ивкIун ур. 1977-1983 шиннардий ивкIун ур МахIачкъалаллал аьрали комендантнал кумагчину. Ванал диркIун дур хъунама мичманнал чин.
Дур Аьралуннал ва хьхьирил флотрай къуллугърал буржру дакI марцIну бартбигьлай тIий дуллуну диркIсса медаллу.
1993-ку шинал аьрали частирдава лавгун, Оьмар зун ивкIун ур Дагъусттаннал медициналул академиялуву, мюхчаншиврул къуллугърай. 2004-ку шинал зун ивкIун ур вава къуллугърай Дагъусттаннал педагогикалул университетраву. Сайки 10 шинай ивкIун ур шикку зий. Махъсса 5 шинай Оьмар зий ивкIун ур Дагъусттаннал ЦIуллу-сагъшиву дуруччаврил министерствалий вава мюхчаншиврул къаралданул къуллугърай.
Оьмар ия дакI-аьмал хъинсса, хIал бавкьусса адимина. ЧIярусса шиннардий Аьрали къуллугъирттай ивкIсса Оьмардун ххирая гьармуниву низам, тIайлашиву. Чув зий ухьурчагу, хIурматрай икIайва даврил уртакьтурачIа, ххирая дустуран ва гъан-маччанан.
Жяматран бусравсса Къапихъал Исмяиллул ва Хадижатлул кулпатраву урчIва оьрчI бия. Миннаву цаннаяр ца язисса арула арс бия. Миннава ца Оьмар уссия ливчIун. Цинявппа оьрмулул къабувччуну дунияллия лавгунни.
Оьмар аьпалул шаврил кьурчIишиву кIидачIлай, жижара буллай буру ванал кулпатрахь, душварахь, ссихь, махъсса гъан-маччанахь.
Имандалий лавгун лякъиннав, рухI алжаннул ххари даннав.
Гъумучиял
ва Ккурккуллал жямат
Чавтараев Апаннинал арс Зайналаьбид
аьпалухьхьун лагаврил жижара буллай буру мунал гъан-маччаминнахь. ДакI-аьмал хъинсса адамина ия Зайналаьбид.
Цал бунагьирттал аьпа баннав, алжаннул ххари аннав. Мунан бакъамур оьрчIан булуннав.
Аьбдуллаев Аминнул кулпатрал цIания
Дус дакIнийн утлай
ХIакьину жул хIакьсса дус, Ккулатусса Бархху МахIаммадлул арс Дундар ХIажиев увсса кьинир. Ганан хьунтIиссия 86 шин.
Гьарца шинал жу ва кьинигу, жула бувсса кьинирдугу лавайсса даражалий кIицI лагайссия. Гьашину тIурча, жун ва кьини Дундар акъа хьунадакьин нясив хьунни, Дундар сентябрьданий хар-хавар бакъа жуятува личIи хьунутIий.
Къавхьунни жуща жула дус уруччин, яуван, хIакьинугу жущала зана-кьулу хъананмур бан.
ХIакьину тIурча, жун ччай бур гьарца ишираву авкьусса, яхI-намусрай, узданну ва дугърину оьрму бутлай ивкIсса, кулпатрал дакI мяшсса заллу, душварал, арсваврал, гайннал оьрчIал ххирасса ппу, ттатта, дустуран хъамакъаиту, бюхттулсса зунтталчу Дундар ганал кулпатращал, вайнная бивзминнащал ва гъан-маччанащал архIал дакIнийн утан. Ва ахиратраву алжаннувун нясив аннав, махъминнал оьрмурдай барачат бишиннав.
Гъаза Гъазаев
Гьарун ХIасанов
Сулайман Мусаев
Аьвдуссалан Магьдиев
ХIажинал арс Маммаев Шяъван
Октябрь зурул 20-нний оьрмулул къаувччуну дунияллия лавгунни ххаллилсса лаккучу, чIявучин бусравсса Маммаев Шяъван ХIажинал арс.
Увссар Шяъван 1961 шинал Ахъушиял райондалийсса ЦIалякъаннал шяраву, цIа дурксса, шяравугу, райондалийгу хIурматрайсса кулпатраву. Шяъваннул хъунттатта ЦIалякъаннал шяраву хъунмасса хIаллай юзбашину зий ивкIун ур.
Бархъаллал дянивмур даражалул школагу къуртал бувну, Шяъван увххун ур МахIачкъалаливсса балугърал промышленностьрал техникумравун. Вагу ххуйсса кьиматирттай къуртал бувну, аьралуннаву къуллугъ бан лавгун ур. Зана хьуну махъ Ростовуллал областьрай балугъ ябайсса инспекторну зий ивкIун ур. Мунияр махъ чIярусса шиннардий зий ивкIун ур МахIачкъалалив Дагснабрай.
Цува ва хъунмасса идаралий зузисса чIумал Шяъваннул кумаг бувссар, чIарав авцIуссар чIявусса инсантурал. Ва зий уссия цаймигу личIи-личIисса идарарттай. Чув ухьурчагу, цала инсаншиву ккаккан дансса, цува лаккучу ушиву чIалачIи бансса гъира бикIайва ванан.
Махъсса шиннардий Шяъван зий уссия Лениннул комсомолданул цIанийсса паркравусса Аьрали савлугърал музейраву. Ва даврийгу ванаяту рязину бикIайва каялувчитал ва архIал зузими.
Шяъваннул хIарачат бувна, ххуйсса тарбиягу дуллуну, дуккингу бан цала арс ва душ.
Махъсса ппурттуву ва чялишну гьуртту хъанай ия цала нитти-буттал ва шяраваллил жяматрал захIмат бивхьусса, утти тили-хъили хьусса ЦIалякъаннал колхозрал иширттаву.
Шяъван аьпалул шаврил кьурчIишиву кIидачIлай, жижара буллай буру ванал кулпатрахь, оьрчI-душварахь, ссихь ПатIиматлухь ва цинявппа гъан-маччанахь.
Цал бунагьирттал аьпа баннав, рухI алжаннул ххари даннав, гьав нурданул дуцIиннав.
ЦIалякъаннал жямат,
гьалмахтал, дустал
Сагидлул душ Сагидова Сяъди
Ноябрь зурул дайдихьулий, оьрмулул 83 шинаву, мадара хIаллай къашавайгу бивкIун, аьпалухьхьун лавгунни ГьунчIукьатIрал шяравасса Сагидлул душ Сагидова Сяъди.
Бувну бур Сяъди 1934 шинал ГьунчIукьатIрал шяраву. Школагу буттал шяравува къуртал бувну, дуклан бувххун бур Медициналул училищалувун. Цила шяравасса Амирдун щар хьуну, муния махъсса цилва оьрму Сяъдил бувтун бур Каспийскалий. ЧIярусса шиннардий ва зий буссия поликлиникалий медсестрану.
Сяъди бия хасиятрал кIукIлусса, дакI-аьмал ххуйсса хъамитайпа, лагмацириннащал бавкьусса, цума-цаннангу кумаграл ка тIитIин хIадурсса инсан. Ванил агьлу-авладгу бур щарнил жяматраву бусравсса.
Сяъдил бивкIулул кьурчIишиву кIидачIлай, жижара буллай буру ванил арсурваврахь, гъан-маччанахь. Цил бунагьирттал аьпа баннав. Алжан нясив баннав.
ГьунчIукьатIрал
ва КIямашрал жямат
МахIаммадлул душ ХIусманова Рашидат
Уттигъанну, цIуцIи шаний мадара хIалгу бувну , оьрмулул 80 шинаву аьпалухьхьун лавгунни инсаншиврул бутIа ххишалану буллусса, яхI-къириятрал заллу, уздансса лакку хъамитайпа, ТтурчIиял МахIаммадлул душ Рашидат ХIусманова.
Рашидатлун цила ппу янинвагу ккавккун акъар, му ивкIуну ур ва дунияллийн букканнина.
Бувну бур Рашидат Лакрал райондалий ТтурчIиял шяраву, 1939 шинал. Школагу ЦIуссалаккуй къуртал бувну, бувххун бур Дагъусттаннал пединститутравун математикалул факультетрайн. Институтраву гьарцагу чулуха итххявхсса, дакI-аьмал ххуйсса, сахIибулхайр дусса душ цинявннан ххирану, цIу буну бивкIун бур. МуницIунма Рашидатлул ххуйну балайгу учайсса бивкIун бур. Цалчинмур курсирай (1959 ш.) Москавлив декадалийнгума гьан бувну бивкIун бур.
ЗахIматрал ххуллу байбивхьуну бур Рашидатлул 1963-ку шинал, ЦIуссалакрал райондалий учительну зий. Яла 3 шинай зий бивкIун бур ЦIуссалакрал райкомрай аьмсса отделданул хъунмурну, МахIачкъалалив бивзун махъ, чIярусса шинну дурну дур «Сбербанкрай» административ, пландалул ва кадрардал отделданул хъунмурну. Махъсса 5-6 шинай зий бивкIун бур Дагъусттаннал КIулшиву дулаврил ва элмулул министерствалий архивраву.
Чув, ци даврий зий бунугу, Рашидат бия захIмат байсса, тIайлашиву ччисса, инсантуран хъинбала бан чялишсса, кьадарданул ци рищавуртту дарчагу, инсаншиврий оьрму бувтсса, мяйжаннугусса зунттал хъамитайпа.
Рашидат ахиратрал хьусса хъуннасса кьурчIишиву кIидачIлай, жижара буллай буру ссурваврахь Ульянахь, ПатIиматлухь, Марияннухь, миннал оьрчIахь, гъан-маччанахь, щалвагу агьлу-авладрахь.
Цил гьав нурданул дуцIиннав, пирдавс-алжан булуннав. Махънал оьрмурдай барачат бишиннав.
ТтурчIиял жямат
