[dropcap]В[/dropcap]ай гьантрай Самара шагьрулий хьусса Боксрал Аьрасатнал чемпионатрай ххув хьунни Дагъусттаннай спортрал ххуллийн
бувксса мукьа боксер: Жамал Бадруттинов (60 кг. кIушиву) – Санкт-Петербурграхлу увксса, Альберт Батиргъазиев (57 кг.) – Ханты-Мансийскалухлу, Расул Салиев (52 кг.) ва Шагьаппас МахIмудов (69 кг.) – Дагъусттаннахлу.
Р. Къардашов
Ялунгу Дагъусттаннал ряха боксернал ларсунни чарвитул медаллу: ХIасан МахIаммадов (63 кг.), Вадим Мусаев (69 кг.), Жамбулат Бижамов (75 кг.), Шарабуттин Атаев (81 кг.), МахIаммад-Мурад Арсланбагов (91 кг.).
Боксрал чемпионатрал яла лаваймур даражалул тренерну ккаккан увунни Рашидбаг АхIмадов, ванал вардиш увсса шама боксернал чемпионатрай бувгьунни хьхьичIунми кIанттурду.
Дагъусттаннал боксертурал 10 медаль ларсъсса Аьрасатнал чемпионат ккаккиялунсса чемпионатран ккалли дан бучIир.
Токио шагьрулий 2020 шинал хьунтIисса Олимпиадалийн нанисса Аьрасатнал боксертурал командалувун багьаншиврул жула боксертуран ххув хьун аьркинни уттигу цаппарасса язи бугьай боксрал турнирдай.
