Ларгсса гъинттул июньдалул 6-нний Ххунзахъиял райондалийсса ГьуцIалтIиял шяравасса ХIамзатов МахIаммадлул неххавун багьсса 9 шинавусса душ ххассал бувну бур.
З. АьбдурахIманова
Га кьини 15 шинавусса МахIаммад цала нитти-буттащал ва уссурссуннащал Къуйсу неххал зуманив игьалаглай ивкIун ур. Вай бакъасса, га кьини неххацI бигьалаган бувкIсса цаймигу халкь чансса къабивкIун бур.
Ца ппурттуву МахIаммадлун ттуплищал архIал щинавун багьсса чIиви душ ххал хьуну бур. Хъунмасса пикригу къабувну, чIава жагьил га ххассал бан неххавун ххявххун ур. Гьалаксса щинал аьтарттува душгу бувгьуну, зуманицIсса мурхьирал къяртлуцIун лавчIун ур га. Ялун бувкIсса халкьуннахьхьун душгу буллуну, цувагу неххал зуманив увккун ур. Щинава увккун махъ МахIаммад цувагу, ванал нину-ппугу мукIру хьуну бур ванан ххуйну гьузун къакIулну бивкIшиврий. Ххассал бувсса душгу цала райондалиясса ца шяравасса Чупанова Аьйшат бивкIун бур.
Укун нигь дакъасса, цаманал оьрму ххассал бансса кьянкьашивугу, чувшивугу цавура ляркъусса арс тарбия аврихлу хъунмасса барчаллагь тIий бур душнил нину-ппу ва вайннал уссур-ссу. Ванал бувмур цаща оьрмулийгу лахъан къахьунссар тIий, тавакъю буллай бур хасъсса къуллугъирттахьгу, дагъусттанлувтурахьгу ва оьрчIан награда дулун кабакьира, чIарав бацIияра тIий.
