[dropcap]М[/dropcap]удана куна, вай гьантрайгу «Илчи» кказитрал редакциялийн увкIунни жул бусравсса хъамаличу, Дагъусттаннал Шяраваллил хозяйствалул министерствалул ризкьилул отделданул хъунама Юсуп ХIасанов.
Ванал жухь бувсунни зунттал районная ятту кIинтнил даэрдайн куч баврил давуртту ссайн дирну дуссарив.
ХIасан Аьдилов
Юсуп ХIасановлул тIимунийну, гьашину гъинтнил минардая кIинтнил даэрдайн куч буллай бур 436 азаллий 508 бакI яттил хIайвандалул: миннувату, бахьтта бачин бувну, даэрдайн бивну бур 396 азаллий 510 бакI, машинарттай – 39 азаллий 998 бакI.
Октябрьданул 25-ннийнин кIинтнил даэрдайн бивну бур мукунма 2557 бакI лухIи ризкьилул ва 185 балчан.
Лакрал райондалия даэрдайн бивну бур 31200 бакI яттил, 1677 бакI лухIи ризкьилул ва 150 балчан.
Ккуллал райондалия машинарттай бувххуну бур 14528 бакI яттил ва 286 – лухIи гъаттарал, ливчIми най бур бахьтта.
Юсуплул бувсунни мукунма ятту даэрдайн куч буллан паччахIлугърал чулухатусса кумаграл хIакъиравугу. Мунал тIимунийну, уттинин паччахIлугърал ми иширттан кумаг къабайсса бивкIун бур.
ЯлунчIил, ятту кIинтнил минардайн ва интту гъинтнил минардайн куч булланшиврул, паччахIлугърал кумаг хIисаврай итабакьинтIий бур 50 млн. къурушрал. Миннух куч буллантIий бур архсса манзилданий бахьтта буцин захIмат хъанахъисса кIанттурдайн: Кочубейллал, Бакресуллал, Уланхоллал зонардая.
Шиккува бусан, Дагъусттаннайсса кIинтнил даэрдал аьрщараяр ххишала, ДР-лул хозяйстварттал аьркин дуллай бур Къалмукь Республикалий 101,2 азарда гектар ва Ставрополлал улклуй 57,2 азарда гектар.
КIинтнил даэрдай дур республикалул 39 райондалул 552 хозяйствалул аьрщив.
