ДакI дарцIуну буру жула пишакартал ххув хьунтIишиврий

Вай бяст-ччаллаву гьуртту хьунни Аьрасатнал Федерациялул 85 субъектраясса 1800 жагьилсса пишакар.

Ши­кку гьуртту хъанахъиминнал кка­ккан дунни 62-нния ливчусса журалул пишардал магьиршиву. Ва чемпионатрал 9 журалул компетенциялий гьуртту хьунтIисса пишакартал язи бувгьуссия Дагъусттаннай хьусса чемпионатрал финалданий.

Москавливсса чемпионат­рал финалданул бяст-ччаллу хьунтIиссар ноябрь зурул 20-22-нний.
«Успех» тIисса Республикалул жагьилтал давурттал дузал баврил центрданул директор, региондалийсса «Абилимпикс» ва WorldSkills суккушиндарал центрданул каялувчи Шамил МахIаммадовлул бувсунни гьашину Дагъусттаннаясса пишакартал шамилчин гьуртту хъанахъишиву Москавлив хьунтIисса «Абилимпикс» чемпионатрал давриву.
— ДакIнийн бутанну, 2017 шинал жула пишакартурал вай бяст-ччаллаву мусил ва арцул медаллу ларсшиву, 2018 шиналгу шанна арцул ва ца чарвитул медаллащал махъунмай бувкIшиву. Уттигу жу, вай бяст-ччаллаву гьурттушинна дан ххуйну хIадургу хьуну, дакI дарцIуну буру вайннуяргу гьарзасса наградарттащал махъунмай бучIаншиврий, — увкунни ванал.

КIицI лаганну, жула республикалий хъуннасса къулагъа­срайн лавсун бушиву «Абилимпикс» суккушинна хьхьичIуннай даврил масъала. Ва исват хъанай бур Дагъусттаннал БакIчи Владимир Васильевлул ва Дагъусттаннал ХIукуматрал Председатель Артем Здуновлул республикалий хъанахъисса захIматрал пишарду машгьур баврил чемпионатирттал давривух мудангу гьурттушинна даврийн бувнугу.

Имара Саидова