1999 шинал Дагъусттаннал аьрщарай хьусса дяъвилул иширттал чIалачIи бунни жула халкьуннал хIал, иш багьни, лагма лаган, цаннал чIарав ца бацIан хIадуршиву,
ккаккан дунни жула чIиваркIуннал къучагъшиву. ЦIунилгу исват бунни жула халкьуннан цасса Аьрасатнал паччахIлугърай ялапар хъанан ччай бушиву.
ЦIуссалакрал аьрщарай дяъвилул ишру нанисса чIумал, милицанал зузалт ва Липецкаллал ОМОН боевиктурал шалклува бувксса куц укун дакIнийн бутлай ур таний ЦIуссалакрал райондалул виваллил иширттал отделданул хъунаману ивкIсса Муслим Даххаев.
— Сентябрь зурул 5-нний, кIюрххил, ссят ряхра хьусса чIумал, къаралданий бавцIуминнал баян бунни боевиктал райондалийн бувххун най бушиву. Миннал бусласимунийн бувну, боевиктал Гьамиящиял, ТIюхчардал, ЦIуссалакрал шяраваллавун най бушиву кIул хьунни. КъачагътурачIа бакъасса ярагъ бакъая: пулеметру, ракетартту, минометру, АГС-ру. Дия ттизаманнул рация. Миннаща вичIи дишин бюхълай бия милицалтрал ихтилатирттах. Гужру архIалсса бакъанугу, нигь-ццах дакъа талай бия жула оьрчIру ва Липецкаллал ОМОН-лул аьралитал. Автоматчиктурал ва гранатометчиктурал кумаграцIух чялиш бувккун бия боевиктурал снайперталгу. Жул ца блокпост буссия ТIюхчардал шяраваллил зуманив. Миккусса ттул зузалтгу жандалия ка ларсун талай бивкIссар. ЧIявусса боевиктал бат бувссар. Пострал хъунама АхIмад Давдиевлул къучагъшиврий жан дуллуссар. Къачагътал бивкIссар мунахь оьруснал саллатI булурча, сагъ-саламатну гьан битанну Дагъусттаннал милицалт тIий. Давдиевлул амру бувссар зузалтрайн боевиктурайн цIу тIитIин. ХьхьичI кьини хьхьувай дежурствалий ивкIсса АхIмад, та кьини шава икIан аьркинну бивкIссар, амма паракьат дакъасса тагьар чIалай му пострайн увкссар.
Дурламалувух уруглагисса АхIмадлун ккавккун бур боевиктал милицанал отделениялийн гьужум буллай бушиву. Жавабран райотделданува битлатисса чIурду баяйхту, АхIмад ххари хьуну ур. «ОьрчIру сагъну бур, — пикри бувну бур ванал, — тайннан кумаг аьркинни». Автоматгу лавсун, кIия цаймигу милицагу увцуну, ва шяравун авчуну ур. Вайннан хьунабавкьуну бур нигьа бувсъсса шяраваллил агьлу. Миннал бувсун бур шяраву чIявусса боевиктал бушиву, райотделданул къатри боевиктурал вив ларсун душиву, милицалтрайн пулеметирттава ва гранатометирттава цIу тIиртIуну бушиву. Цаппара боевиктал тIурча, къатравух буклай, милицалт ххал буллай бушиву. Шяраваллил жямат милицалтрахь, цайми яннагу ларххун, лабикIияра тIий бивкIун бур. АхIмадлун къаххуй бивзун бур цахьва мукун учаву. Миннахь, къатраву, лувчIиннив лабикIияра куну, маслихIатгу бувну, цува зузалтращал битавуртту нанинийн авчуну ур.
Вай бувккун бур райотделданул лагма рургьусса боевиктурал къинттуллухун. АхIмад ва ванащалсса Аьли Гъавзиев боевиктурайн битлан бивкIун бур. Гранатометирттава райотделданийн битлатисса кIия боевик, хьумур бувчIиннин, бивчуну бур милицалтрал. Бат бувну бур цаппарасса ялагу.
ЦIубутIуй боевиктал гьанавиххи хьуну бур, цала къинттуллухун душман цукун увкссарив бувчIин къабюхълай. АхIмад данди авцIуну ивкIссар боевиктурайн патронну духлаганнин. Боевиктурал пулеметрава цIу дирхьуну увтссар мютIи ан къавхьусса АхIмад. Автомат кIунттища хIура къабувну, виричунал кунна жан дуллуссар ванал. АхIмадлун дахьра 31 шин диркIссар. АхIмад ия дакI хъинсса, аьчухсса, цаманал чIарав ацIан хIадурсса жагьил. Ва ххирая шяраваллил халкьуннан. Дуллалимур лажин кIялану бартдигьайсса ия. ЧIивисса оьрмулуву ва бусрав хьуну ия жяматран ва архIал зузиминнан.
Увну ур АхIмад 1968-ку шинал май зурул 11-нний ТIюхчардал шяраву. КьурбанмахIаммадлул ва Бажил тарбия бувну бур цала оьрчIру захIмат ххирану, хъунанал хIурмат буну. ТIюхчардал школагу къуртал бувну, АхIмад увххун ур политехнический институтравун. Институтравугу ва сий дуну ивкIун ур. Аьралуннаву къуллугъ бувну увкIун махъ зун ивкIун ур райондалул виваллил иширттал отделданий.
Дяъвилул иширттаву ккаккан дурсса къучагъшиврухлу АхIмадлун дуллуссар Къучагъшиврул орден (аьпалул хьуну махъ). Зунттал чувнан лайкьну бувтссар ванал цала кутIасса оьрму. АхIмадлул цIа дуллуссар ва дуклай ивкIсса ТIюхчардал школалун, пионертурал дружиналун, шяраваллил кIичIираваллин. Кьура шин ларгунни тай ишру хьуния шиннай. Арамтал хьунни АхIмадлулгу, ванал кунна, ватан дуручлай жанну дуллусса цинявнналагу арсурваврая. Жула аьрщарайн ххявхсса дунияллул террористал ххит бувсса ххаришивруцIун, вайннайн данди бавцIуну жан дуллуминнаясса пашманшивугу дур дакIниву.
-Вай кьянкьасса, цIиникьру кунмасса, зунттал жагьилтал, хъамаллурал хIурмат байсса зунттал аьдатрайн бувну, бару бувну бавцIунни оьруснал аьралитурал чIарав. Майор Даххаевлул тIурча, баян бунни: «Нигьамабусару чачаннал къачагътурая, тай так жул жаназарттайхри зучIан гъан хьунтIисса», — куну. Укун буслай ур ЦIуссалакрал райондалул милицалтрая та чIумалсса Липецкаллал ОМОН-лул хъунама Сергей Сковородин.
Жунма абадлий дакIний бикIантIиссар ватан душманная дуручлай жанну дуллусса жула вирттал.
Эмма Тыщенко
Лакку мазрайн бувцуссар
А. Аьбдуллаевал
