[dropcap]В[/dropcap]ай гьантрай Москавлив хьунабавкьунни билаятрал Президент Владимир Путин ва Дагъусттан Республикалул БакIчи Владимир Васильев. Вайнна вайннал дянив хьусса ихтилатравасса цаппарасса кIанттурду.

В.Васильев:
— Ина Дагъусттанная лавгун махъ дурмунил ккаккияртту ласав на ттущалла.
В. Путин:
— Хъунмасса гъирарай урганна миннух.
В. Васильев:
— Цалчин, ми думи ккаккиярттайн бувну, винна чIалай дикIантIиссар хъин чулийннайсса дахханашивуртту хьуну душиву. Жун ччисса куццуй, анаварну къахъанарчагу, чан-чанну тIий, лахъ хьуну най бур дянивсса харжгу…
ТIайлассар, Гособоронзаказ яларай дагьаврийн бувну, зузи кIанттурдалмур («высокопроизводительные рабочие места») масъала къулайну бакъар… ФАС-рал бивхьусса кьиматрайн бувну, 70 процентрал лагь хьуну бур къуллугъчитурал антимонопол законодательство лиян дурсса ишру…

Итталун дагьансса хьхьичIуннай­шивуртту хьунни чIиримур ишбажаранчишиврул аралуву… Лагь хъанай бур мискиншиврул шачIану, хъунна хъанай дур агьалинал оьрмулул лахъишиву ва даража…
Амма, онкологиялия тIурча, биял хъанай бакъар муницIун бикIан аьркин­сса тахурдил фонд («коечный фонд»), цIанасса чIумал мунилссагу буллай буру…

ТуберкулезрацIун бавхIумур масъала личIлай бур ца яла захIматми масъаларттал сияхIрай, шикку жу, дянивну ларсъсса Аьрасатнал ккаккиярттайн бувну, махъун багьлай буру…

ЖучIа «Кавказ» трасса бивну бур Чачаннал Республикалийн, ччива мукьва ща бумур ххуллу бувну. Ттигу-шилагу ххуллурдай чIявусса инсантал литIлай бур, ацIва зурул дянив республикалул ххуллурдай ивкIуну ур 267 инсан, 1900 ур цIунцIияртту хьусса.

Миннавух федерал трассардай ивкIуну ур 119 инсан, лихха-личча хьуну ур 676 инсан. Циванни? Грознайлийн кунмасса федерал ххуллурду бухьурча – микку я ДТП-лухун агьан, я ахьттачунайн машина щун буван бюхъай­сса иш бакъар – цанчирча цимурцаннул хIисав ларсун бувсса ххуллурду буну тIий. ЖучIарив, цуксса хIайпнугу, ва масъала цIурювкьусса масъаланува личIлай бур. Ттул вихьсса цаппара тавакъюрдаву буссар ва иширацIунгу ка-кумаг бувара тIий…
ХIадур хъанай буру ялунчIилсса шинайнсса бюджет кьамул буван ва му бивкIссаннуяр къулайсса хьунтIиссар…

2018 шинал налогру датIаву 20 процентрал гьаз дуван бювхъунни. Ми хъанахъиссар ялун ххисса 6 миллиард, миннува 900 миллион харж бувссар щинацIун бавхIусса масъалартту щаллу баврин.

ХIадур бувссар
Бадрижамал Аьлиевал