Ассаламу аьлайкум, ххирасса лакрал жямат!
Жула рубрикалуву хIакьину ттун зухь бусан ччива хъинну гьунар бусса, итххявхсса, чIивисса оьрмулуву чIярусса

 ххувшавуртту ларсъсса жула лакку оьрчIая, хъуниминнал ва оьрчIал филармониялул солист, Чапаевкаллал шяравасса Маликлул ва Иринал арс Мурад Хушлаевлуя.

---

Вай гьантрай «Вдохновение» тIисса дунияллул халкьуннал дянивсса конкурсрай, «Вокал» номинациялий ванал ларсунни ирг­лийсса Гран-При.
Мурадлун дахьра 12 шинни. Ряхра шин хьуния шинай ур ва балай учаврихун агьну. Мурад дуклай ур МахIачкъалаллал №39 лицейраву ва 2-мур музыкалул школалий. Уттинин ва гьуртту хьуну ур личIи-личIисса дунияллул халкьуннал дянив­сса конкурсирдай. Цалчин­сса кIанттурду бувгьуну, лавсун бур 43 кубок, миннува кIийла – Гран-При. Мурад гьуртту хьуну ур Аьрасатнаву сий дусса музыкалул конкурсирдайгу: «Мусил нота», Москавлив, «Гъинтнил калейдоскоп» Пятигорскалий. Мукуна Ростов-на-Дону шагьрулий хьусса «ЦIурттал фиеста» конкурсрай. Американал Broadway Dreams мюзикл­раву гьуртту хьунсса оьрчIру язи бугьлагьисса чIумал, 2000 оьрчIава язи бувгьуминнавух (23 инсан) Мурадгу ивкIссар. Мурад мукуна гьуртту хьуссар «Поле чудес» капитал шоулий. Оьрмулул 11 шинаву ванал цалалусса концерт дуллуссар Москавлив Таганкалий, Высоцкийл клуб-ресторандалуву. Мурадлул хьхьичIуннайшивурттуя ва ххувшавурттуя ккалаккинал щилчIав ва 12 шинавусса чIава жагьилли къаучинссар. 2018-ку шинал ванал ларсун дур «ХьхьичIунсса инсантал» тIисса награда. 2019-ку шинал ва агьну ур «Ккаккияртту ва хьхьичIуннайшивуртту» тIисса Щалагу Аьрасатнал энциклопедиялувун. Мурад лайкь хьуну ур Дагъусттаннал ХIукуматрал чулухасса ва кIийла Дагъусттаннал Культуралул министерствалул чулухасса наградарттан.
Ноябрь зурул 30-нний хьун­тIисса Golden talant тIисса Дунияллул халкьуннал дянивсса вокалданул ва хореографиялул конкурсрай Мурад икIантIиссар жюрилуву.
Ца ххарисса хавар ялагу: уттиния тихунай гьунар бусса жула лакку оьрчI дуклантIиссар Игорь Крутойл академиялуву.
-Мурад Хушлаевлул цимилагу ттигу баян бантIиссар цаятува, — тIий, ванал хьхьи­чIуннайшивурттая ххарину бур преподавательтал Светлана Николаевна, Рамазан Абуталибович ва Светлана Салмановна.
Ххарину буру вайннацIун жугу, «Лакку билаятрал рухI» группалувуми. ЧIа тIий буру Мурадлун уттиния тихунмайгу так тIайлабацIуртту, хьхьичIуннайшивуртту, ххувшавуртту.