Чаравал
КутIасса справка
[dropcap]Ч[/dropcap]араваллал шяравалу диркIссар Лакку билаятрал кьиблалул чулий, райцентрдания яла архмур кIанттай, 35 км. манзилданий, 2500 метIралул лахъшиврий.
1886-ку шиналсса Аьрасатнал паччахIлугърал дурсса переписьрайн бувну, Чараву диркIун дур 39 тIюва, микку яхъанайгу ивкIун ур 162 инсан.
Та чIумалсса цайми-цаймигу зунттал агьали кунма, Чараваллал чиваркIгу лагайсса бивкIун бур хIалтIилухун, хъунмурчIин Дулттияллил лахъазанттуйх хьуну, чIаххуврайсса регионнайн, дахху-ласулул ва къалайчишиврул пишалий.
Чараваллал хъаннил цIа дурккун диркIун дур ппалул ххаллая личIи-личIисса исвагьисса затру щащаврил.
Коллективизациялул чIумалсса оьсса иширттал щавщи вайннайн личIину щуну бивкIун бакъар. Чанну-ххину дусса инсанну ккалли хъанай ивкIун ур ХIадисов Худа тIисса инсан. Мунал бивкIун бур мукьа хIухчинсса ятту, 12 балчан, кIи-кIива ниц 20 лухIи гъаттара. Ванал цIаницIунсса махIаттал хьунсса бур ца цамур затгу: Хъунмасса Буттал кIанттул цIанийсса дяъвилул фронтрайн лавгун ур ванал 4 арс, цаягу зана къавхьуну ур. Цува Худагу аьпалухьхьун лавгун ур ЦIуссалаккуйн бивзун 2 шинавату.
Зунттава бизан байни Чараву диркIун дур 59 хозяйство, яхъанай ивкIун ур 226 инсан. ЦIуссалаккуй Чаравал миналул хьуну бивкIссар Ярыксу неххал киямур чулух. ЦIу ппурттуй колхоз диркIун дур Кагановичлул цIанийсса. Яла махъ, ЦIуссаккуллацIун цачIун дурну мукьахь, колхоз диркIссар Лениннул цIанийсса. Мунияргу махъ, ЦIуссаккулатугу батIул хьуну, цачIун хьуну диркIссар Ждановлул цIанийсса ЦIуссачIурттащиял колхозрацIун.
ХIакьинусса кьини Чаравал щар сакин хьуну дуссар МахIачкъалаллал зума-къирагърайсса цIусса миналий.
