[dropcap]С[/dropcap]ентябрьданул 2-нний, цIусса дуккаврил шинал цалчинсса кьини, ДР-лул БакIчи Владимир Васильев гьуртту хьунни Кас­пийскалий 800 оьрчIансса цIусса школа тIитIаврий.

[dropcap]М[/dropcap]у школа буллай байбивхьуссар дукIу «АьФ-лул инсантал хъинсса къатрал ва коммунал хIаллихшиннал щаллу баву» тIисса паччахIлугърал программалул лагрулий. ХIакьинусса кьини школа дузал бувну бур аьркинсса кьай-кьуйлул, мунил лагмасса кIанттурдай дузалшинна дурну дур.

[dropcap]Ш[/dropcap]адлугърал линейкалий бав­цIусса гьурттучитурайн лаизлай, Дагъусттаннал БакIчинал миннахь барча кунни КIулшивурттал кьини. «ХIакьину жува шадлугърал тагьарданий тIитIлай буру 800 оьрчIансса цIусса школа. Вара чIумал тIитIлай буссар ялагу 4 школа: уттигу ца Каспийскалий, Къумтуркъалаллал райондалий Къорхъмаскъалаллал шяраву, Южно-Сухокумскалий ва Бабаюртуллал райондалий Новокареллал шяраву. Барчаллагь учин ччай бур школартту бувминнахьгу, педагогтурахьгу, нитти-буттахъал комитетирттахьгу, миннал му даву шадлугърайн дуккан даврихлу».
Дагъусттаннал БакIчинал бувсунни мукунма «100 школа» тIисса ва «150 школа» тIисса проектру дузрайн дуккан давриятугу.

Владимир Васильевлул хъинчулийсса дахханашивурттуну кIицI дурунни школартту аьркинсса луттирдал щаллу бавугу. Мунал тIимунийну, цIусса шин дайдихьлахьиссар школар­тту уквасса луттирдал дузал баврийну – сайки 2 млн. луттирдал бувкIссар школарттавун, миннувату 146 азарва – ниттил мазурдийсса.
Дагъусттаннал БакIчинал бувсунни мукунма ЕГЭ дулаврил хIасиллаятугу, «Шяраваллил учитель» тIисса проект бартдигьаврил давурттаятугу.
БавтIми цIусса дуккаврил шинащал барча буллалисса махъ лавхъунни мукунма Каспийскаллал мэр МахIаммад Аьбдуллаевлулгу.
Школа тIитIаврий гьуртту хьунни ДР-лул вице-премьер – республикалул дуккаврил ва элмулул министр Уммупазил Оьма­рова ва цаймигу.