Дайдирхьунни цIусса дуккаврил шин, школардал дакъасса, гихунмайсса дуккаврил идарартталгу тIиртIунни оьрчIал хьхьичI цалла нузру. ЦIакь хьусса аьдатрайн бувну, Дагъусттаннал медициналул университетраву хьунни цIуну бувкIсса жагьилтал студентътурал кьюкьравун кьамул буллалисса шадлугърайсса батIаву.
Муний гьуртту хьунни ДР-лул Халкьуннал Мажлисрал председательнал хъиривчу Камил Давдиев, ДГМУ-рал ректор Сулайман Маммаев ва м.ц.
Бадрижамал Аьлиева
— Барча буллай ура цинявппагу цIусса дуккаврил шинал дайдихьулущал. КIулшивуртту – ялун бучIантIимунил гьанур. Дурккусса инсантал – жулва билаятрал национал мюхчаншивур.
Агьаммурдив – агьалинан буллалисса медициналул кумаграл даражари. Му даражагу хъар шайссар медициналул пишакартал хIадур баврия. Дагъусттаннал медициналул университетрал тIурча, авадансса тарих буссар ларайсса квалификация дусса медициналул ва фармацевтикалул пишакартал хIадур баврил. Жул пахру – жула выпускникталли. Цикссагу жул выпускниктал зий буссар жулла республикалийгу, Аьрасатнал регионнайгу, гъанмур ва архмур дазул кьатIувгу, — увкунни Сулайман Нураттиновичлул.
Гьашину ДГМУ-лувун дуклан увххун ур Цасса паччахIлугърал экзаменнай 100 балл лавсъсса шама студент. Миннан, барчагу бувну, бахшишру дуллунни ректорнал.
Ахирданий цалчинмур курсирал циняв студентътурал Аьрасатнал Федерациялул хIакиннал присяга кьамул бунни ва ссавруннайн итабавкьунни гьавалул шарду, лархъунни университетрал гимн. Шадлугъ къуртал хьунни кIяла хялатирттавусса ва кIяла кьяправусса студентътал кьюкьрай «ДГМУ» хIарпирдай бацIаврийну.
