Суаллу ва имамтурал жавабру
-ЦIанакул интернетраву, социал сетирдай оьрчIру-душру кувнначIан кув чагъарду, ссаламру гьан буллай бур. БучIиссарив, тIайлассарив?
— Шариаьтрайн бувну чил хъаннищал, душваращал ихтилат буллан къабучIиссар, хIарамссар. Ва суал булуннин цал пикри буван аьркинни, вила ссу, душ ягу цамур гъансса хъамитайпа чил адиминащал ихтилатру буллай, ягу интернетраву чичлай бивкIссания, ина му иширах цукун уруганссияв?
— Бала-апатI ялун бивсса чIумал, цукунсса дуаь дуккайссар?
— Мусиват, бала-апатI бивсса чIумал, ва дуаь дуккайссар: «Инна ли-ллагьи ва инна илайгьи ражиоьн. Аллагьумма ажирни фи мусибати ва ахлиф ли хайран мингьа». Мяъна: «ХIакьну, жула Зал Аллагьри, ва АллагьначIанну жува зана бикIантIисса. Я Аллагь, ва мусиват ттун чирину тIайла бацIан бува ва ххуймунийн кIура баен бува».
— Хамискьини цадакьа бувну хъинссар тIун бикIай. Исламрай мунил хIакъираву ци увкуну бур?
— Цадакьа та буварчагу, мунил чири хъунмассар. Хамискьини тIурча, му кьини маркIачIаннай дайдихьлахьиссар нюжмар хьхьу, мунилли му чIумал бувсса цадакьалул чири гьарза бувайсса. Нюжмар хьхьуну ва нюжмар кьини бувсса цадакьалул даража хъинну лахъссар. Жула инсантураву аьдатравун багьну бур хамискьини буллай, амма мунил тарихравун буругарча, кIул хьунтIиссар хьхьичIазаманнай цадакьа нюжмар хьхьуну бувайсса бивкIшиву. Мува куццуй бивкIу хьусса къатлуву хамискьини кIюлаччатI бачIлан ягу «Ясин», Кьулгьу-Кьуръан ккалан бикIай. Ми давурттугу хамискьини маркIачIан бивзун махъ ягу нюжмар кьини дурну хъиннура хъинссар
