[dropcap]Ф[/dropcap]евральданул 13-нний Аьрасатнал Президент Владимир Путиннул Иннополис тIисса Татарсттаннал шагьрулий дунни ПаччахIлугърал советрал президиумрал гьартасса батIаву.
Муний ххал бивгьунни АьФ-лул исполнитель властьрал органнал агьалинал ялапаршиндарал тагьар ххуй-хъин даншиврул дуллалисса давурттал хIакъиравусса масъала. БатIаврий гьуртту хьунни ДР-лул БакIчи, ПаччахIлугърал советрал президиумрал член Владимир Васильев.
БакIрай бувсунни цIусса Иннополис тIисса шагьру хIасул шаврил хIакъираву. ДукIу мунин хьуссар 3 шин, му хъанахъиссар Аьрасатнал яла жагьилмур шагьру. Тикку лядурккун най дур Ватандалул информациярттал технологиялул индустрия.
Шагьрулул мастер-план хIадур дурну диркIссар Лиу Тай Керром тIисса Сингапурдал архитекторнал, дузрайн дуккан дурссар Татарсттаннал архитектортурал. Шагьрулул вирдакI хъанахъиссар университет Иннополис, микку лахьлай буссар информациярттал технологияртту ва роботирттал техника. Вузраву дуклайгу бур, элмугу лядуккан дуллай бур, бизнесрахун багьангу лахьлай бур. Президиумрал батIаврий хьхьичIмахъ лавхъунни паччахIлугърал каялувчинал. Мунал тIимунийну, ихтилат буллантIиссар агьалинал ялапаршиндарал шартIру ххуй-хъин даврил хIакъираву, шагьрурдай ва шяраваллаву инсантурал оьрмулунсса къулайшивуртту дузал даврия, цIуну дуллалисса къатрал даража лавай баврия ва ми машан ласун хьунсса, кьювкьусса даврия.
Владимир Путиннул бувсунни мукунма билаятрай бартдигьлай бушиву кугьна хьусса къатрава халкь бизан баврил программагу. Ми циняв масъаларттал хIакъираву бувсун буссар «Жилье и городская среда» тIисса Национал проектрай.
ПаччахIлугърал бакIчинал мукунма бувсунни июльданул цанния махъ щурун тIий душиву къатри давринсса арцу итадакьаврил цIусса схема. Ихтилат бунни шагьрурдал бигьалагай кIанттурдал тагьар, чIалачIин ххуй-хъин даврил хIакъиравугу.
