«Илчилул» кутIа суаллахьхьунсса жавабру

Акбардул арс Жабир Абакаров

Увну ур Хъусрахь 1954-ку шинал. Буттал шяраву учкъулагу къуртал бувну, 1971-кусса шинал увххун ур Рязаннал 

областьрайсса Сасовуллал граждан авиациялул училищалийн. Та училище къуртал бувсса 1973-ку шиная шинай хIакьинусса кьинилийн ияннин зий ур Аьрасатнал Транспортрал министерствалул авиапредприятиярттай.

Ва ур 1-мур классрал пилот, гьаваллаву лехлахаврил чIумул лахъишиву лирчусса дур 10000 ссятраха.
Бартбигьлай ивкIсса къуллугъирттал сияхI дур укунсса: Ан-2 самолетрал 2-ма пилот; АН-2 самолетрал командир; АН-24 самолетрал 2-ма пилот; АН-2, АН-28 самолетирттал эскадрильялул командир; леххаврил кьюкьлул командирнал заместитель; МахIачкъалаллал ЦачIундур авиациялул командирнал 1-ма заместитель.
2016-ку шиная шинай зий ур Дагъусттаннал авиакомпаниялул генеральный директорнал маслихIатчину.
Бувккуну бур: Сасовуллал леххаврил училище (1973); Дагъус­ттаннал политехинститут (1984); Граждан авиациялул академия (1988).
Техникалул элмурдал кандидат.
Аьраяллил чин – подполковник.
Аэрофлотрал отличник.
ДР-лул транспортрал лайкь хьусса зузала.
Дусшиврул ордендалул лауреат.


Чарил нигьирттай гьарусса хъурунхъуссагу, увал хьхьахьхьаригу


1.Цукунсса хьуна оьрчIний вийнма яла гужсса асар биян бувсса зат, иш?
ОьрчIнийсса асарду цаннияр ца яргсса, хъамакъабитайсса бикIай. Бигьану бакъар цания ца язи бугьангума. На чIивисса чIумал, ницахун ччиннугу дархIуну, ттарацIув ччар дайссия. МахIлалул оьрчIан му ца чIири-хъунсса байран кунна чIалан дикIайва.
Ца кьини, жулламур ччар дуллалисса чIумал, ттарацIату жула ичIуннай парачах нахь ххилаххисса чIаххувхъами хъин дитаншиврул, ниттил на гьан увнав ччар даннин бувкьун бивкIсса повидлалул ссахI ласун. Урувгунна: лагмава сагъну-саламатну бунува, ссахI щалва вивату бачIва хьуну бия. Ххал барча, ттул хъунама уссил Ризваннул ганил кIива чулух, ххал къашайсса кIанттай, ппурдух дур­ккун дия кIира исвагьисса ккутI. Яла, дакIнийн багьтари, лавгун, цIупIа тIий, хьюмусса повидлалул нахIала байсса бивкIун бия. ТIулдакъашиву дурсса чIумал, жу мукIру баншиврул, ниттихъал Кьурандалул луттирай ка дишин байвав. Нара цичIав къавкъиншиву къадурсса чIумалгума, Кьурандалий ка дишин ивчIануксса нигь дикIайва. Шайссарив хъамабитан уку-укунсса асарду!

2. Цими никирайн дияннинсса кIулли вин вила ппухълуннал нясав? Буси яла архманал цIа.
Бутталмур къяртлухсса кIулли мукьра никирайн дияннинсса, ниттилмур – шанна никирайн дияннинсса. Буттал Акбардул тухум бия Ккужанахъул тIисса, буттал ниттил ПатIиматлулмур тухум бия Кубачанхъул тIисса. Ниттил, Залмул, буттал Гаргац-Мирзал тухум бивкIун бур Чаргаснавасса. Гаргац тIисса цIагу чаргас тIисса мукъуя хьусса дур.

3. Инсаннал хасиятраву винна яла ккарккун къаччимур лишан?

Лавмартшиву.

4. Вила оьрмулуву яла алши бакъамур шин?
Нину ахиратрал хьусса 1991 шин.

5. Яла алши бумур шин?
Чансса дакъая алши бусса шиннугу. Махъсса шиннардива на язи дугьавияв 2017 шин, нара ниятрай дуллалисса даву бартларгсса шин.

6. ВичIара циксса арцу хьувкун, дигьаларгун дикIанссия вил дакI?
Ттул оьрмулуву хьуссар чIунну арцу дуссагу, дакъассагу. Хьунадаркьуссар захIматшивурттугу. Амма вайксса арцу ттунна ччива кусса зат бакIравун къабувхссар.

7. Инсаннал тахсирдавасса цумур тахсир хьунссия вища бигьану багъишла битан?
Нижат лархIуну къабувмур, ягу пикри къабувну хьумур.

8. Бувагу къабитан?
Ххуймунил ххари къаайссагу, оьккимунил пашман къаайссагу инсан къаикIайссар. Инара вихшала дирхьуну ивкIсса инсан лавмартну уккаву.

9. Ссан диял къашай вил чIун?
Кулпатрах, оьрчIах, оьрчIал оьрчIах ца къулагъас ххину уруган­сса чIун диял къашай.

10. Бартлавгун ччисса вила шанма мурад?
Кулпатрангу, гъан-маччанангу цIуллу-сагъшиву. Дуниял паракьатну личIаву, жула буттахъан ккавкмур жунма къаккаккаву. Буттал къатригу цIу дуккан дурну, кIикку бичинсса гьантригу къачансса лякъаву.
11. Вила оьрмулуву хъинну ххирасса кIантту бувгьу­сса шама инсаннал цIа?
Ттулла нину Залму, щарсса Людмила, Цинпаев МахIаммад, Аьлиханов Аьлихан
12. Винма ххуй бизайсса хъамитайпалул сурат?
Ттул нину дия ляличIинура караматсса, дакI-аьмал уздансса, хъамаритан къахьунсса мяърипат­рал заллу.

13. Вина кьамулсса чув адаминал сурат?
Ттула ссурахъу Макьсудхъал Аьлил (аьпа баннав цал!)

14. Агарда бюхъайсса бивкI­ссания, инава ци кIанттай, ци чIумал увну ва ци билаятрай яхъанай ччива вин?

Нава угу-увну, хъунагу хьусса кIанттай – Хъусрахь. Ялапар хъанангу Дагъусттаннайнияр ххуйсса кIанттугу цамур чулданий чIалан къабикIай.

15. Ссаяту бикIай вил яла хъунмур пахру?
Ттун пахру бикIай нава лаккучу ушиврия. Ттула оьрчIангу, Лаккуй хъуни хьуминнануксса кIанийн бувтун кIулну бакъанугу, на лаккучура чинсса кьяйдалия лакку маз кIулшиврия.

16. Цукунсса дур вил виятура­сса къарязишиву?
На сайки гьарцаннайн вихшала дишайсса ура. Нара ттинин дурмурнияр къадурмур гьарзану чIалан дикIай.

17. Яла ххирамур дукра?
Лаккуй чарил нигьирттай гьарусса хъурунхъуссаннул накь, увал хьхьахьхьари.

18. Яла къаххирамур дукра?
ЦIарайх бувсса аьнакIи.

19. Ссаятусса бикIай яла хъунмамур хIучI?
Цал вихшала дишингу увну, яла нава аххарахха тIисса.

20. Хьуссарив вил оьрмулуву винна инара ттинин багъишла ритан къахъанахъисса къел?
Хьуссар. Нину цакуну инжит хьуну дуну, МахIачкъалалия хIакинталгу бувцуну, Лаккуйн лавгссияв. КIива-шанма гьантлий ниттичIа больницалий уссияв. КIанил хIал къулай хьувкун, ттун ялавай гьан багьуна. КIа хьхьуну вихшалагу дишин бувну, нину ахиратрал хьуну дия, ниттил махъва-махъсса ссихIирачIа нава къаикIаврия хъинну пашманну ура.

21. Лавгсса заманардавасса цIанихсса инсантурава­сса цуманащал хьунаакьин ччива вин?
Сталиннущал. «Сталин» тIисса цIа ттун мудангу «Ххувшаву» тIисса махъну баллан бикIай. Ттул телефондалул трубкалийгу занглин кIанттай «Ххувшаврил кьини» тIисса балай буссар.

22. Цукунсса бур, вил пикрилий, лакрал миллатрал яла хъунмур буруккин, цукунсса бур мунил ялун бучIантIимур?
Лак шагьрурдайн бивзун бур, бизлай бур. ЩийкIуй аьй дуллай акъара: цала маэшат абад бан хIарачатрай ур гьарма. Къаччан бикIаймур тIурча, бур кьатIув лавгсса лак оьрус мазрай гъалгъа тIий бушиву. ЧIун ларгукун, цайминнахьхьун арендалий дуллалисса хъу-лухччи зана ритан хьунссар. Ниттил маз бухлагарча, зана битан къахьунссар.

23. Ци дахчилай дур хIакьину Дагъусттаннахун, цил аьнт­IикIасса кIанттун ва надирсса миллатирттан лавхьхьуну, ххуйнугу, ххаллилнугу ялапар хъананшиврул?
Дагъусттаннал зунттал районнай хIакьинусса кьинилун лавхьхьуну яхъанансса, лайкьну оьрму бутлансса шартIру, хIаллихшиннарду дикIан аьркинни. Мурив тIурча, дакъар. Та хьунтIиссарив чингу хъинну захIматри.