Сочилийсса Аьрасатнал инвестициярттал форумрал махъра-махъмур кьини Дагъусттаннал БакIчи Владимир Васильев гьуртту хьунни АьФ-лул ХIукуматрал Председатель Дмитрий Медведевлул билаятрал субъектирдал бакIчитуращалсса хьунабакьаврий. Муний ххал бивгьунни социал бутIа лябуккан баврин хасъсса национал проектру дузрайн дуккан даврил масъалартту.
Премьер-министрнал тIимунийну, регионнайсса цинярда захIматшивурттаяту хIакьину ихтилат буван аьркинссар, федерал центрданул вакилтуран миннуя кIулну бикIаншиврул ва аьркинсса хIукмурду кьамул баншиврул. Национал проектирдал паспортру хIадургу бувну, микку чIалачIи дурну дуссар мурадлувсса ккаккияртту ва миннул жаваблувтал, ляркъуссар проектру дузрайн дуккан дувансса арцугу. АьФ-лул сайки циняв субъектирдал чирчуссар властьрал федерал органнащалсса кьутIирду субсидияртту дулаврил хIакъираву.
«ХIакьину жунна яла захIматмур социал тема дур, цанчирча кIулну бикIан аьркинну бур чув лахьхьинтIиссарив хъинсса пиша, чув дуклан аьркинссарив, цумур азарханалийн гьантIиссарив хъин хьун, цукунсса напакьалийн тамахI бишинтIиссарив – мукунсса ва цаймигу суаллу буллай бур гьарца кьини. Миннунсса жавабруну хьун аьркинссар жулла давуртту», — увкунни ХIукуматрал Председательнал.
Хьунабакьаврий Дмитрий Медведевлул бувсунни мискиншиврул даражалун кьимат бищаву цамур журалий дуллан. Мунал тIимунийну, кьимат бищайни, инсантурал доходирттаяр ххишала, харжлугъгу хIисавравун ласун аьркинну бушиву. Мискиншиврул масъала дузал бан бюхъантIиссар, агарда паччахIлугъраща гьарца мискинчуначIансса ххуллу лякъин бюхъарча. Му мурадрай АьФ-лул ЗахIматрал ва социал иширттал министерствалул щурущи дурунни 8 региондалий мискиншиву чан дансса пилотрал проект.
Премьер-министрнал бувсунни цIуллушиву дуруччаврил ва дуккаврил масъаларттал хIакъиравугу.
