[dropcap]В[/dropcap]иваллил иширттал органнал зузалтрал байрандалуцIун бавхIуну, вай гьантрай жу хьунабавкьуру Дагъусттаннал виваллил иширттал министр, полициялул генерал-лейтенант 

МахIаммадлул арс Аьвдурашид МахIаммадовлущал.

-Аьвдурашид МахIам­мадович, гьашину Аьрасатнал Виваллил ишир­ттал министерствалул кIицI ларгунни полициялул органнал гьану бивзун 300 шин бартлаглагисса юбилей. Ци учинна мунил хIакъираву?

-Мяйжаннугу, ва хъунна­сса агьамшиву дусса дата хъанай дур. ВаницIун бавхIуну Аьрасатнал Виваллил иширттал министерствалул бунни хъунма­сса мажлис. Нагу гьуртту хьура му мажлисрал мероприятиярттай. Цалчинна хьусса Кремлилувусса Съездирттал дворецраву. Жун ккаккан дунни ххаллилсса концерт. ТIааьнсса асардащал зана хьура.
Революция хьуннингу, хьуну махъгу бивкIссар Дагъусттаннай полициялул зузалт зий. Хъунмасса Буттал кIанттул цIанийсса дяъвилул шиннардийгу ккаккан бувссар жула милицалтрал цала хIал. Виваллил иширттал органнал зузалтраясса кIиннан дуллуссар Совет Союзрал Виричунал цIа.
Къабигьасса диркIссар республикалул полициялул зузалтран 90-ку шинну. Му чIумалгу захIматсса шартIирдай дуручлай бивкIссар низам ва агьалинал мюхчаншиву. На дакIнихтуну барчаллагьрай ура, чIярусса захIматшивурттугу дурхIуну, дакI къадурккун, цала пишалул буржру лайкьну бартбигьлагьи­сса жула зузалтрахь.

-Ци учинна хIакьину республикалийсса криминал тагьарданул хIа­къираву?
-Аьмну циняв уголов тахсиркаршивурттая гъалгъа тIурча, оператив тагьар , гьай-гьай, бигьасса дакъар, амма къуманивун дагьссагу дакъар. Дуссия чIунну шинай 300 инсан ивкIусса тахсиркаршивуртту сияхIрайн ласласиссагу. ЦIанасса чIумал му журалул 65-70 тахсиркаршиврул ккал дур. Мукунна даххана хьуссар цайми журалул тахсиркаршивурттал ккалгу. Щил ци тIурчагу, на дакI дарцIуну ура: «Дагъусттан – криминал респуб­лика дакъар, дагъусттанлувталгу – тахсиркаршивурттайн кIункIу тIисса агьлу бакъар».

-Балжину бувсун ччива цумур чулуха ххуйсса ягу хьхьарасса ккаккияртту хьуссарив?
-Жу ляличIисса къулагъа­с­райн лавсун буссар халкьуннал бакIрачIан чIявусса баларду буцлацисса экстремизмалул масъала. Ва чулухуннай республикалул МВД-лул хъуннасса даву дурссар. Жунна цинявннан дакIнийссар лув-ялув оьхIалсса терактру дуллалисса, органнал зузалтрал бакъассагу, агьалинал оьрмурдангу хъунна­сса нигьачIаву дусса, халкьуннавун ццах багьсса шинну. 2010-ку шинал республикалий 10 теракт хьуну дур, махъми шиннардий цахъис чанну – 5,7,8.. ХIакьину республикалийсса тагьар чIаланну паракьат хьушиву цинявннан чIалачIиссар. 2010,2011, 2012-ку шиннардий жу сияхIрайн ласайссия терроризмалул ва экстремизмалул журалул 1000-нний дирсса тахсиркаршивуртту. ЦIана мукун­сса 300 иш бур.

[pullquote]1775 шинал Петр I хIукмулийну Жяматийсса низам дуру­ччаврил къуллугъ сакин бувния шихунмай ва службалуву цимиллагу дахханашивуртту хьуну дур. 1917 шинал ноябрь зурул 10-нний бувккун бур рабочая милиция сакин баврил хIакъиравусса декрет. 1962 шиная байбивхьуну кIицI дуллай бивкIун бур Аьрасатнал милицанал зузалт­рал кьини.[/pullquote]

-Чялиш буккан бува­сса «шанашисса ячейкартту» («спящие ячейки») цIанасса чIумал жучIара циксса дуссарив кIулссарив органнан?
-Виваллил иширттал министерствалул ФСБ-лувасса жула коллегахъащал хъинну ялув бавцIуну дуллай буссару му даву.
Так нанисса шинал республикалий жуща ашкара бан бювхъунни мукунсса ацIвахъул группарду. ХIайп, цаппара иширттаву жуща миннал оьхIалшивурттан ххуллу кьукьин къабювхъунни.
Каспийскалий, автозаправочный станциялий виваллил иширттал органнал зузалтрайн ярагъуннищал ххявххунни. Ва иширал хъиривлаявуртту дулай, мукунмасса группарду ашкара бан бювхъунни Дарбантлив, Хасавюртлив, Къизлардай, МахIачкъалалив, Буйнакскалий. Уттигъанну Буйнакскалий жул зузалтрал увгьуссар органнал зузалт оьрмурдацIа бан хIадур хьусса мукьа инсан.
Жу ва даву тачIавгу хIура хьун къаритлатиссару. Буссар жу мудангу итталу бувгьусса ва журалул тахсиркаршивуртту дан кунмасса инсанталгу.

-Сириянал билаятрай­сса иширттаву гьуртту хъанахъисса дагъусттанлувтурая ци бусан бю­хъанссар?
-Мугу яла хъуннасса къулагъасралу битан багьлагьисса масъаларттавасса цар. Гьашину 25 инсан увгьуссар, Сириянава зана хьусса. КIицI къабувну къабучIир, махъсса ппурттуву хъинну чан хьунни тихун наними. ЦIана жул хъунмур мурад бур, хьхьичIва тихун лавгун, зана хьуми кIул баву.
Ци чулийгу, цIанасса чIумал 1500 дагъусттанлув талай ур закондалуцIун къадаркьу­сса ярагъуннищалса кьюкьраву Сириянал республикалий ва цаймигу дяъвирду нанисса кIанттурдай. Му чулухунмайгу ххишаласса гуж бувтун зун багьлай бур.

-Ци учинна хIакьинусса республикалул ххуллурдайсса тагьардания?
-Хъунмасса буруккин бутлатисса, леххаву дутан багьлагьи­сса тагьар дур. Гьашину­сса шинал республикалий ДТП-ттай оьрмулуцIа хьуну ур 350 инсан, ларгсса шинналнияр цахъи чанну. Ва чулухуннайсса даву бюхъайссаксса гуж бувтун дуллан багьлай бур. ТIайлассар, вай иширттан савав хъанахъимур цимурца жул биялдарай­сса, жуща чаран лякъин бюхъай­сса бакъар. Жула аьрщарайх нанисса федерал трасса 60-ку шиннардил шартIирдайсса бур. Та чIумал республикалий 100 азарвавагу машина къабивкIссар. ЦIанасса чIумал республикалий миллиондалийн бивсса машинартту бур, ххуллурив баххана хьуну бакъар. Мунияту, инсантал оьрмурдацIа хьусса бачIи ишру «Кавказ» федерал трассалий хъанай бур. Шиккува кIицI бан, ва ххуллул цаппара бутIри бакьин бувну дахханашивуртту дурну махъ ми кIанттурдайсса апатIругу чан хьунни.
Ялагу, Дагъусттаннай шанма бутIул кIива бутIа зун­ттал кIанттурду бур. Щупиртурал дуручлай бакъар зунттал ххуллурдайх заназиминнаясса тIалавшиннарду.
-Аьвдурашид Ма­хIам­мадович, ина 30-нния лирчусса шинну дурну дур виваллил ишир­ттал органнаву личIи-личIисса къуллугъирттай зий, минува 8 шин – министрнал къуллугърай.

Цуми шинну дия винна яла захIматми? Хьуссарив хIукму бан захIматсса тагьарданувун агьсса чIуннугу?
-Республикалул виваллил иширттал органнангу, ттун ттуннагу яла захIматми дия 90-ку шинну, царай законнай ялапар хъанайгу бивкIун, ца формациялия цакуну цамунийн бувкIсса. Му чIумал на (1992 шинал дайдихьу) зий уссияв Хасаврай. Та бия циняв миллатирттал суккушиннарду щурущи­сса шагьру. МуницIун — Чачаннавусса ишругу. Та чIумал Хасавюртуллал райондалул ва шагьрулул, ЦIуссалакрал, Казбековуллал районнал отделлу хьхьичIва-хьхьичI байбивхьуссар зузалтрацIа хъанай. ЛяличIисса тагьар диркIссар, жун багьссар укунмасса чIумал къабайсса хIукмурду буллан. Тай дия экстремизм ппив хьуну нанисса, виваллил иширттал органнал зузалтран республика паччахIлугърал канища къаду­ккан талан багьлагьисса тагьар дусса шинну.
ЗахIматсса хьуна, ттунма дакIний-мазрай бакъанма, нава хъунмасса жаваблувшинна ду­сса министрнал къуллугърай ивтсса 2010 шингу. Ца шинал дянив терактирдаву ливтIуна 157 виваллил иширттал органнал, ФСБ-лул, прокуратуралул зузалт ва укунмасса инсантал. Оьрмурдай хIайп къаувкуну, щаллу буллай бивкIссар цала къуллугърал буржру виваллил иширттал органнал зузалт.

-Рязину урав хIакьину зучIава къуллугъ буллан букIлакIисса жагьилсса зузалтрал хIа­дур­шиннарая, пишакаршиврул даражалия?
-На рязину ура жучIава къуллугъ буллан ччай бушиврия, жула къуллугъ сийлий бушиврия. Дагъусттанлувтуран гьарица чIумалгу ххирар форма. Цайми субъектирдай виваллил иширттал органнаву зун къананисса чIумал, жу конкурсрал гьанулий кьамул буллай буру.

-Пишалул бай­ран­далуцIун бавхIуну, цуми подразделениярттая цIа дуван ччива?
-ХьхьичIва-хьхьичI кIицI бавияв оператив къуллугърал подразделенияртту. Респуб­ликалийсса тагьарданул ялув бацIаву, агьалинал мюхчаншиврун нигьачIаву дусса ишру, экстремизмалул- террорданул тахсиркаршивуртту дан бюхъайсса инсантал ашкара баву хъунмурчIин миннайн багьлагьисса масъалартту бур.
Хъунмасса барчаллагь учивияв, хьхьу- кьини къаувкуну, кьатIув, ччимур шартIирдай къуллугъ буллалисса патрульно-постовой нарядирттахь, силис­тталул ва дознаниялул подразделениярттахь. ЧIявусса бур жучIа къуллугърал буржру лайкьну биттур буллай, республикалий паракьатшиву дузал дуллали­сса зузалт.

-Цукун кьамул дара вила чулухуннайсса критика?
-Ва къуллугъ цуппава зума-ккарччулусса, чIярусса аьй-бювкьурду дучIайсса къуллугъ бур. Цаппара затру хIисавравун ласара. Гьарца аьй-бювкьулул хъирив изларча, оьрму биял къахьунссар. Ттула агьаммур даврин харж дансса чIун миннулсса буллай харж дуллан къаикIара. Ттухь цIуххирча, оьрмулуву тачIав яла винна нач хъанансса тIул дан къааьркинссар. Мури яла агьаммур зат.

-Цинярдагу МВД-лул мероприятиярттай гьур­тту шай республикалул БакIчи Владимир Васильев. ЧIалай бур та мудан зул чIарав ушиву.
-Гьай-гьай. Республикалул БакIчи ур Аьрасатнал МВД-лул генерал-полковник, министрнал хъиривчуну зий ивкIсса инсан. Танан ххуйну кIулну бур жу ссаха ва цукун зун аьркинссарив. Жунгу жуйрасса жаваблувшинна хъиннура асар хъанай дур. ХIарачат буллай буру республикалий хъанахъисса ххуй чулийннайсса дахханашивурттацIун жущава шайсса кумаг бан, чIарав бацIан.

-Аьбдурашид МахIам­ма­дович, виваллил иширттал органнаву лайкь дурсса наградар­тту вил чансса дакъар. Цумур дур миннува винна яла язимур?
-Цумур духьурчагу награда – му ттул къуллугъран, даврин лавайсса кьимат бищаву хъанай дур. МиннуцIа цинявннуцIа на ххариссара. ДиркIссания агьалинан бусравну уну тIий дулай­сса, масала, агьалинал чулуха барчаллагь баян буллалисса награда – му дикIанссия ттул яла бусравмур ва яла язимур.

Ихтилат бувссар
Андриана Аьбдуллаевал